ភ្នំពេញ៖ កម្ពុជា សម្រេចបានការដឹកជញ្ជូនអ្នកដំណើរតាមផ្លូវអាកាសសរុបចំនួន ៦,២៤លាននាក់ មានកំណើនប្រមាណ២២% ពីជើងហោះហើរសរុបចំនួន ៥៨ ៣៥៤ជើង កើនឡើង១៤% ក្នុងឆ្នាំ២០២៤។ ចំណែក ការដឹកទំនិញតាមផ្លូវអាកាសវិញ ក្នុង២០២៤ មានចំនួន ៧៧ ៨៥២តោន ដែលមានកំណើន៤០% បើធៀបនឹងរយៈពេលពេញមួយឆ្នាំ២០២៣។

សម្តេចធិបតី ហ៊ុន ម៉ាណែត លើកឡើងថា កំណើននៃការដឹកជញ្ជូននេះ គឺដោយសារអាកាសយានដ្ឋានអន្តរជាតិភ្នំពេញ សៀមរាប និងព្រះសីហនុ បានដើរតួនាទីយ៉ាងសំខាន់ លើការតភ្ជាប់ជើងហោះហើរអន្តរជាតិទៅកាន់ ១២ប្រទេស ព្រមទាំងតំបន់រដ្ឋបាលពិសេសហុងកុង និងកោះតែវ៉ាន់ ដោយសរុបបានភ្ជាប់ការហោះហើរចំនួន៣៤ ក្នុងតំបន់ និងសកលលោក និងមានក្រុមហ៊ុនអាកាសចរណ៍ជាតិនិងអន្តរជាតិសរុប ៣១ក្រុមហ៊ុន។

ក្នុងឆ្នាំ២០២៤ កម្ពុជា ក៏បានសម្រេចលើការតភ្ជាប់ជើងហោះហើរជាប្រតិ្តសាស្ត្ររវាងរាជធានីភ្នំពេញ និងរដ្ឋធានីញូវដែលី ប្រទេសឥណ្ឌា និងការចាប់ផ្តើមហោះហើរឡើងវិញរបស់ក្រុមហ៊ុនអាកាសចរណ៍ អេមីរ៉ាត់ និងកាតា ដែលផ្សារភ្ជាប់ជើងហោះហើររវាងភ្នំពេញ និងទីក្រុងឌុយប៉ៃ និងទីក្រុងដូហា។ ក្នុងឆ្នាំ២០២៥ កម្ពុជា មានក្រុមហ៊ុនអាកាសចរណ៍ជាតិ និងអន្តរជាតិចំនួន៣១ ដែលកំពុងហោះហើរចេញ-ចូល និងគិតជាមធ្យម មានជើងហោះហើរទ្វេទិស (Flight Movements) ចំនួន ១ ៣២៤ជើង ក្នុងមួយសប្តាហ៍ ក្នុងនោះជើងហោះហើរទ្វេទិស នៅអាកាសយានដ្ឋានអន្តរជាតិភ្នំពេញចំនួន ៩៤២ជើង អាកាសយានដ្ឋានអន្តរជាតិសៀមរាបអង្គរ ៣៤៦ជើង និងអាកាសយានដ្ឋានអន្តរជាតិខេត្តព្រះសីហនុ ៣៦ជើង។

ការដឹកជញ្ជូនតាមផ្លូវអាកាស មានគោលដៅចូលរួមអនុវត្ត «យុទ្ធសាស្ត្របញ្ចកោណ-ដំណាក់កាលទី១» របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ស្ថិតនៅក្នុងបញ្ចកោណទី២.ការធ្វើពិពិធកម្មសេដ្ឋកិច្ច និងការបង្កើនភាពប្រគួតប្រជែង និងមុំទី២.ការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងឡូជីស្ទីក វិស័យថាមពល វិស័យទឹកស្អាត និងវិស័យឌីជីថល។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី៤ ខែមីនា ឆ្នាំ២០២៥៕