ភ្នំពេញ៖ ព្រឹត្តិការណ៍អង្គរសង្ក្រាន្តឆ្នាំ២០២៥ នឹងប្រារព្ធក្រោមប្រធានបទ «ញញឹមសាទរសង្ក្រាន្តឆ្នាំថ្មី» ដែលឆ្លើយតបទៅតាមបំណងរបស់ប្រជាពលរដ្ឋទន្ទឹងរង់ចាំវត្តមានព្រឹត្តិការណ៍នៅលើទឹកដី នៃខេត្តសៀមរាប។ គោលបំណងចម្បងនៃការរៀបចំព្រឹត្តិការណ៍អង្គរសង្ក្រាន្តនេះ គឺដើម្បីលើកស្ទួយមរតកវប្បធម៌អរូបី លើទីតាំងនៃមរតកវប្បធម៌រូបី ពិសេសការបង្កើតនូវឱកាសជួបជុំ ផ្ដល់ស្នាមញញឹមដល់មហាគ្រួសារខ្មែរនាឱកាសបុណ្យចូលឆ្នាំថ្មី។

ជាមួយគ្នានេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការរៀបចំព្រឹត្តិការណ៍អង្គរសង្រ្កាន្ត បានដឹកនាំកិច្ចប្រជុំតាមដានវឌ្ឍនភាពការងាររបស់គណៈកម្មការរៀបចំព្រឹត្តិការណ៍អង្គរសង្រ្កាន្តឆ្នាំ២០២៥ ដើម្បីបង្ហាញពីវឌ្ឍនភាពការងាររៀបចំរបស់ក្រុមការងារគ្រប់ចង្កោមនៃគណៈកម្មការរៀបចំ ក៏ដូចជាពិនិត្យ និងបន្តរៀបចំផែនការអនុវត្តការងារត្រៀមឆ្ពោះទៅថ្ងៃព្រឹត្តិការណ៍។

គូរបញ្ជាក់ថា កិច្ចប្រជុំដែលធ្វើប្រព្រឹត្តទៅកាលពីថ្ងៃទី១១ ខែមីនា ឆ្នាំ២០២៥ នៅមជ្ឈមណ្ឌលម៉ានី អគារThe Kampus មានការចូលរួមពីសំណាក់ឯកឧត្តម លោកជំទាវ ជាប្រធានចង្កោម ប្រធាន និងតំណាងក្រុមការងារ ព្រមទាំងសមាជិកសមាជិកាក្រុមការងាររៀបចំ ប្រមាណ ២០០ នាក់។ នេះបើយោងតាមការចុះផ្សាយរបស់សហភាពសហព័ន្ធយុវជនកម្ពុជា នាថ្ងៃទី១២ ខែមីនា ឆ្នាំ២០២៥៕