ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានបញ្ចូនគ្រូបង្គោលផ្នែកបច្ចេកទេសចូលរួមក្នុងវគ្គបណ្តុះបណ្តាលលើ«វិស័យមេកានិក រថយន្ត សំណង់ និងអគ្គិសនី» នៅប្រទេសចិននាពេលកន្លងមក។ ក្រសួងការងារបានឱ្យដឹងនៅថ្ងៃទី០៣ ខែមករា ឆ្នាំ២០២៤ វគ្គបណ្តុះបណ្តាលដែលមានរយៈពេល១២ថ្ងៃនោះ រៀបចំដោយវិទ្យាស្ថានបច្ចេកទេសហឺណាន និងក្រុមហ៊ុន Yalong Intelligent Equipment Group Co., Ltd នៃសាធារណរដ្ឋប្រជាមានិតចិន។

កម្មវិធីបណ្តុះបណ្តាលដើម្បីពង្រឹងចំណេះដឹង, ជំនាញបច្ចេកទេសរបស់គ្រូបច្ចេកទេស និងពង្រឹងសមត្ថភាព នៃការបង្រៀនរបស់គ្រូបច្ចេកទេសផងនោះ ក្រសួងក៏បានបង្កើនកិច្ចសហប្រតិបត្តិការជាមួយនឹងវិទ្យាស្ថានបច្ចេកទេសហឺណាន និងក្រុមហ៊ុន Yalong Intelligent Equipment Group Co., Ltd ក្នុងការទទួលយកបទពិសោធថ្មីៗ ដូចជា ការអនុវត្តវិធីសាស្ត្របង្រៀន, ការអភិវឌ្ឍ និងអនុវត្តន៍កម្មវិធីសិក្សា និងការផ្លាស់ប្តូរវប្បធម៌គ្នាទៅវិញទៅមកផងដែរ។

តាមរយៈវគ្គបណ្តុះបណ្តាលនេះ គ្រូបច្ចេកទេសរបស់កម្ពុជាដែលក្រសួងការងារ និងបណ្តុះបណ្តាលវិជ្ជាជីវៈ បញ្ជូនទៅសិក្សាបានទទួលចំណេះដឹង និងជំនាញសំខាន់ៗដែលទាក់ទងនឹងវិស័យសំណង់, វិស័យមេកានិករថយន្ដ និងវិស័យអគ្គិសនី៕