ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ ស្នើឱ្យសភាពាណិជ្ជកម្មកម្ពុជា ណែនាំសហគ្រាស គ្រឹះស្ថាន ដែលជាសមាជិក រៀបចំវគ្គបណ្តុះបណ្តាលតម្រង់ទិសការងារដល់កម្មករនិយោជិតជាអតីតពលករខ្មែរទើបត្រឡប់មកពីថៃ មុនចាប់ផ្តើមបំពេញការងារ ព្រោះកម្ពុជា មានភាពខុសប្លែកគ្នាពីបទពិសោធការងារ ដែលអតីតពលករខ្មែរ ធ្លាប់ធ្វើនៅថៃ។

ក្រសួងការងារ ក៏ស្នើសុំការយោគយល់អធ្យាស្រ័យពីម្ចាស់ ឬនាយកសហគ្រាស គ្រឹះស្ថាន ក្នុងការទទួលយកអតីតពលករខ្មែរមកពីប្រទេសថៃ ដោយផ្តល់ឱកាស និងពេលវេលាសមស្រប ក្នុងការសម្របខ្លួនជាមួយនឹងបរិយាកាសការងារថ្មី និងសូមរក្សាកិត្តិយសនិងសេចក្តីថ្លៃថ្នូរដល់ពួកគាត់ ព្រមទាំងចៀសវាងជាដាច់ខាតនូវសកម្មភាពរើសអើងគ្រប់ទម្រង់។ នេះបើតាមសេចក្តីជូនដំណឹងរបស់ ក្រសួងការងារ និងបណ្តុះបណ្តាលវិជ្ជាជីវៈ៕