ភ្នំពេញ៖ ក្នុងឆមាសទី១ ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគសរុបចំនួន ៣៧៣គម្រោង មានទំហំទុនវិនិយោគសរុបប្រមាណ ៥,៨ប៊ីលានដុល្លារ ដែលអាចបង្កើតការងារបានប្រមាណ ២៥,៥ម៉ឺនកន្លែង។ បើធៀបនឹងរយៈពេលដូចគ្នា ក្នុងឆ្នាំ២០២៤ ចំនួននេះមានការកើនឡើង ១៨៣គម្រោង ខណៈទុនវិនិយោគមានការកើនឡើងប្រមាណ ២,៥ប៊ីលានដុល្លារ ស្មើនឹងប្រមាណ ៧៧%។

យោងតាមក្រុមប្រឹក្សាអភិវឌ្ឍន៍កម្ពុជា ក្នុងចំណោមទុនវិនិយោគវិនិយោគសរុបប្រមាណ ៥,៨ប៊ីលានដុល្លារ គឺបានវិនិយោគតាមវិស័យចំនួន៤ រួមមាន៖ ក្នុងវិស័យឧស្សាហកម្ម ប្រមាណ៤,២ប៊ីលានដុល្លារ, វិស័យហេដ្ឋារចនាសម្ព័ន្ធ និងផ្សេងៗ ប្រមាណ១,៥ប៊ីលាន, កសិកម្ម និងកសិ- ឧស្សាហកម្ម ប្រមាណ ១៣០លានដុល្លារ និងវិស័យទេសចរណ៍ប្រមាណ ២០លានដុល្លារ។ ទន្ទឹមនឹងនេះ សម្រាប់គម្រោងវិនិយោគ ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ១៥៧គម្រោង ដែលមានមុខសញ្ញាវិនិយោគលើគម្រោងបង្កើតរោងចក្រផលិតឧបករណ៍បរិក្ខារពេទ្យ និងស្រោមដៃគ្រប់ប្រភេទ, គម្រោងពង្រីកផលិតកម្មផលិតសំបកកង់រថយន្ត, គម្រោងវិនិយោគបង្កើតរោងចក្រផលិតសំបកកង់រថយន្ត និងគម្រោងវិនិយោគបង្កើតរោងចក្រផ្តុំដំឡើងយានយន្ត។

សម្រាប់គម្រោងវិនិយោគ ដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ២១៦គម្រោង ដែលមុខសញ្ញាវិនិយោគលើគម្រោងសាងសង់វារីអគ្គិសនី អានុភាព១៥០មេហ្គាវ៉ាត់, គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ៤៥០មេហ្គាវ៉ាត់, គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលខ្យល់ អានុភាព ៣០០មេហ្គាវ៉ាត់, គម្រោងពង្រីកផលិតកម្មកសិដ្ឋានចិញ្ចឹមគោពូជ និងគោសាច់ខ្នាតធំ គម្រោងវិនិយោគបង្កើតរោងចក្រកែច្នៃលោហធាតុ និងគម្រោងវិនិយោគបង្កើតរមណីយដ្ឋានទេសចរណ៍សេវាកម្មចម្រុះទេសចរណ៍៕