ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សហការជាមួយអង្គការសហប្រជាជាតិដើម្បី​អភិវឌ្ឍន៍​ឧស្សាហកម្ម (UNIDO) បានរៀបចំសិក្ខាសាលា ដើម្បីលើកកម្ពស់ការប្រើប្រាស់ថាមពលកកើតឡើងវិញ សេវាទឹកស្អាត និងវិធីសាស្ត្រសួនឧស្សាហកម្មបៃតង ដូចជាការសន្សំធនធាន និងផលិតកម្មស្អាត សម្រាប់តំបន់សេដ្ឋកិច្ចពិសេស និងសួនឧស្សាហកម្ម។

សិក្ខាសាលាកាលពីថ្ងៃទី១៨ ខែវិច្ឆិកា ឆ្នាំ២០២៥ នេះ មានគោលបំណងចែករំលែកបច្ចុប្បន្នភាពនៃការអនុវត្ត និងបញ្ហាប្រឈមទាក់ទងនឹងថាមពលកកើតឡើងវិញ និងការទទួលបានសេវាទឹកស្អាតនិងអគ្គិសនីរបស់រដ្ឋ នៅក្នុងតំបន់សេដ្ឋកិច្ចពិសេស និងសួនឧស្សាហកម្ម។ សិក្ខាសាលានេះ ក៏បានប្រមូលធាតុចូលសម្រាប់រៀបចំយុទ្ធសាស្ត្រពង្រីកសេវាថាមពលកកើតឡើងវិញ និងសេវាទឹកស្អាត ព្រមទាំងពង្រីកការចាប់អារម្មណ៍ និងការចាប់យកដំណោះស្រាយឧស្សាហកម្មបៃតងទៅអនុវត្ត។

ជាមួយគ្នានេះ អ្នកចូលរួមក៏បានស្វែងយល់អំពីការប្រើប្រាស់ថាមពលពន្លឺព្រះអាទិត្យ និងបានសិក្សាពីរបៀបប្រើប្រាស់វិធីសាស្ត្រសួនឧស្សាហកម្មបៃតង សម្រាប់គាំទ្របរិវត្តកម្មកម្ពុជាឆ្ពោះទៅការអភិវឌ្ឍឧស្សាហកម្មដែលកាន់តែមាននិរន្តរភាព និងភាពប្រកួតប្រជែងជាងមុនផងដែរ៕