ភ្នំពេញ៖ «របាយការណ៍ស្តីពីការត្រៀមខ្លួនរបស់កម្ពុជាលើពាណិជ្ជកម្មឆ្លងកាត់ព្រំដែនដោយពុំប្រើប្រាស់ក្រដាសស្នាម» ជាឯកសារយុទ្ធសាស្ត្រដ៏សំខាន់ ពោលគឺជាមូលដ្ឋានគ្រឹះក្នុងការជំរុញនីតិវិធីសច្ចាប័នលើកិច្ចព្រមព្រៀងក្របខណ្ឌ ដែលនឹងដើរតួជាកម្លាំងចលករក្នុងការធ្វើទំនើបកម្មប្រព័ន្ធពាណិជ្ជកម្មកម្ពុជា ឱ្យកាន់តែមានប្រសិទ្ធភាព តម្លាភាព និងកាត់បន្ថយចំណាយលើប្រតិបត្តិការពាណិជ្ជកម្មឆ្លងកាត់ព្រំដែន។ នេះជាប្រសាសន៍របស់ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម។

កិច្ចប្រជុំពិនិត្យ និងវាយតម្លៃរបាយការណ៍ខាងលើនេះ ជាជំនួយបច្ចេកទេស គាំទ្រដោយគណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិកនៃអង្គការសហប្រជាជាតិ (UNESCAP) ក្នុងគោលបំណងធ្វើបច្ចុប្បន្នភាពលើវឌ្ឍនភាព និងការត្រៀមខ្លួនរបស់កម្ពុជា ក្នុងការងារកិច្ចសម្រួលពាណិជ្ជកម្មឌីជីថលនៅកម្ពុជា និងការត្រៀមលក្ខណៈក្នុងការអនុវត្តកិច្ចព្រមព្រៀងក្របខណ្ឌស្ដីពីកិច្ចសម្រួលពាណិជ្ជកម្មឆ្លងកាត់ព្រំដែនដោយពុំប្រើប្រាស់ក្រដាសស្នាម សម្រាប់តំបន់អាស៊ីប៉ាស៊ីហ្វិក (CPTA) ដែលកម្ពុជា បានចុះហត្ថលេខាកាលពីឆ្នាំ២០១៧។

គួរបញ្ជាក់ថា កិច្ចប្រជុំពិនិត្យ និងវាយតម្លៃរបាយការណ៍ស្តីពីការត្រៀមខ្លួនរបស់កម្ពុជាលើពាណិជ្ជកម្មឆ្លងកាត់ព្រំដែនដោយពុំប្រើប្រាស់ក្រដាសស្នាម ដឹកនាំដោយ លោកជំទាវ តឹករ៉េត កំរង នឹងមានការចូលរួមពី ឯកឧត្តម លោកជំទាវ ជាថ្នាក់ដឹកនាំក្រសួងពាណិជ្ជកម្ម និងក្រុមការងារបច្ចេកទេសពាក់ព័ន្ធ ជាច្រើនរូប៕