ភ្នំពេញ៖ ក្រុមហ៊ុន វីរៈ ប៊ុនថាំ ជួបពិភាក្សាការងារជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីពិភាក្សាអំពីការពង្រីកអាជីវកម្មរបស់ក្រុមហ៊ុន ចូលក្នុងឧស្សាហ​កម្មផលិតអាហារ ជាទំនិញយុទ្ធសាស្ត្រ និងការបង្កើតបណ្តុំសហគ្រាសធុនតូចនិងមធ្យម សំដៅពង្រឹង​ខ្សែ​ច្រវាក់តម្លៃក្នុង​ស្រុក​។

ជាមួយនឹងបណ្តាញដឹកជញ្ជូនដ៏ទូលំទូលាយរបស់ខ្លួន ក្រុមហ៊ុន បានបង្កើត វីរៈ ប៊ុនថាំ ហ្វូដ ​នា​ពេលថ្មីៗ​នេះ ដោយផ្តោតលើរអាជីវកម្មពីរផ្នែក គឺផ្នែកពាណិជ្ជកម្ម និងបណ្តុំសហគ្រាសធុនតូច​និងមធ្យម។ ក្រុម​ហ៊ុន​ មានផែនការផលិត និងចែកចាយផលិតផលម្ហូបអាហារមានគុណភាពខ្ពស់ ដោយប្រើប្រាស់​បច្ចេក​វិទ្យាទំនើប ដើម្បីផ្គត់ផ្គង់ទីផ្សារ។ ជាមួយគ្នានេះ អ្នកឧកញ៉ា សួ វីរៈ បានលើកឡើងថា តំបន់បណ្តុំសហគ្រាសរបស់ក្រុមហ៊ុន អាចផ្តល់គំរូអាជីវកម្ម បែបបណ្តាក់ទុករួមគ្នា ជាមួយការផ្តល់ហិរញ្ញប្បទានពីវិស័យធនាគារ មានហេដ្ឋារចនាសម្ព័ន្ធគាំទ្រស្រាប់ មានសេវា​ទីផ្សារ ប្រេនឌីង និងសេវាដឹកជញ្ជូនចម្រុះ ដើម្បីកាត់បន្ថយចំណាយ និងបង្កើនភាពប្រកួតប្រជែង។ 

ទន្ទឹមនឹងនេះ ឯកឧត្តមរដ្ឋមន្ត្រី ហែម វណ្ណឌី បានស្វាគមន៍ចំពោះគំនិតផ្តួចផ្តើមនេះ និងបានសង្កត់ធ្ងន់ថា កម្ពុជាត្រូវការវិស័យឯកជនដែលរឹងមាំ និងមានសមត្ថភាពវិនិយោគលើទំនិញយុទ្ធសាស្ត្រ និងផលិតកម្មដែលមានតម្លៃ​បន្ថែមខ្ពស់។ ឯកឧត្តម ក៏បានលើកទឹកចិត្តឱ្យក្រុមហ៊ុន វីរៈ ប៊ុនថាំ ហ្វូដ សហការជិតស្និទ្ធជាមួយអង្គភាពបច្ចេកទេសរបស់​ក្រសួង ដើម្បីទទួលបានការគាំទ្រលើការរៀបចំរោងចក្រ ស្តង់ដា ការធ្វើតេស្តវិភាគ វិញ្ញាបនបត្របញ្ជាក់គុណភាព និងការចុះបញ្ជីផលិតផលជាដើម ដើម្បីកសាងទំនុកចិត្តអ្នកប្រើប្រាស់។

ឯកឧត្តម ហែម វណ្ណឌី បានជំរុញឱ្យក្រុមហ៊ុនរៀបចំផែនការវិនិយោគ សម្រាប់ទាំងបំពេញតម្រូវការទីផ្សារក្នុងស្រុក និងសម្រាប់ការនាំចេញ ដោយយកចិត្តទុកដាក់លើលក្ខខណ្ឌតម្រូវបរិស្ថាន-សង្គម-អភិបាលកិច្ច និងអនុវត្ត តាមស្តង់ដារ​អនាម័យ និងគុណភាពឱ្យបានត្រឹមត្រូវ។