ភ្នំពេញ៖ ក្រុមហ៊ុន Zhisheng Energy បានបង្ហាញចំណាប់ក្នុងការស្វែងយល់អំពីបរិយាកាសវិនិយោគរបស់កម្ពុជា ពិសេសការសិក្សាអំពីលទ្ធភាពវិនិយោគលើការចម្រាញ់ប្រេង។ នេះជាការបញ្ជាក់របស់លោក Liu Hui ប្រធានក្រុមហ៊ុន Zhisheng Energy ក្នុងជំនួបជាមួយឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្ត្រី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ។

ក្នុងឱកាសនោះ ឯកឧត្តមបណ្ឌិតសភាចារ្យ ហ៊ាន សាហ៊ីប បានបញ្ជាក់ថា ការវិនិយោគលើការចម្រាញ់ប្រេងនៅកម្ពុជា គឺជាវិស័យអាទិភាព និងទទួលបានការយកចិត្តទុកដាក់ខ្ពស់ពីរាជរដ្ឋាភិបាល។ ក្នុងនោះ ឯកឧត្តមប្រធានក្រុមការងារជំរុញការវិនិយោគក្នុងខេត្តព្រះសីហនុ ក៏បានបង្ហាញអំពី «អត្ថប្រយោជន៍ពិសេស» ទាំងការលើកទឹកចិត្តផ្នែកពន្ធ ការសម្របសម្រួលផ្នែករដ្ឋបាល និងការសម្រួលនីតិវិធីផ្សេងៗពាក់ព័ន្ធនឹងការវិនិយោគក្នុងខេត្តព្រះសីហនុផងដែរ។

ជាមួយគ្នានេះ លោក Liu Hui បានបង្ហាញការចាប់អារម្មណ៍ និងវាយតម្លៃខ្ពស់លើការរីកចម្រើន និងការអភិវឌ្ឍនៃហេដ្ឋារចនាសម្ព័ន្ធគមនាគមន៍ និងសេដ្ឋកិច្ចដែលផ្សារភ្ជាប់ពីខេត្តព្រះសីហនុ ទៅកាន់តំបន់ផ្សេងទៀតនៅកម្ពុជា និងអន្តរជាតិ៕