ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំប្រតិភូចុះពិនិត្យដំណើរការសំណេរនៅមណ្ឌលប្រឡងរាជធានីភ្នំពេញ នាព្រឹកថ្ងៃទី២។ 

ដំណើរការនៃការប្រឡងនៅព្រឹកថ្ងៃទី២ នៃសម័យកាលប្រឡងទី០៧ ខែវិច្ឆិកា ឆ្នាំ២០២៣នេះ មានសភាពនៅមណ្ឌលប្រឡងមានបរិយាកាសស្ងប់ស្ងាត់។ ក្នុងដំណើរការប្រឡងនេះ គណៈមេប្រយោគគ្រប់រូប បានអនុវត្តតួនាទីរបស់ខ្លួនប្រកបដោយស្មារតីទទួលខុសត្រូវ ព្រមទាំងអនុវត្តតាមសេចក្ដីណែនាំប្រតិបត្តិរបស់ក្រសួងអប់រំ យុវជន និងកីឡា សម្រាប់ការប្រឡងសញ្ញាបត្រមធ្យមសិក្សាទុតិយភូមិ។

សូមបញ្ជាក់ថា សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៣ មានរយៈពេល០២ថ្ងៃគឺថ្ងៃទី ០៦-០៧ ខែវិច្ឆកា ឆ្នាំ២០២៣។ ក្នុងនោះ មានមណ្ឌលប្រឡងសរុប ២២៧ ស្មើនឹង ៥,៥៤៣បន្ទប់ នឹងមានបេក្ខជនចុះឈ្មោះប្រឡងសរុប ១៣៧,៤១២នាក់ (ស្រី ៧៣,២៧៨នាក់)។ ចំពោះការប្រកាសលទ្ធផលប្រឡងវិញ គឺនៅថ្ងៃទី២៨ ខែវិច្ឆកា ឆ្នាំ២០២៣ សម្រាប់រាជធានីភ្នំពេញ និងខេត្តកណ្តាល ដោយឡែកខេត្តផ្សេងទៀត នៅថ្ងៃទី២៩ ខែវិច្ឆកា ឆ្នាំ២០២៣៕