ភ្នំពេញ៖ ធនាគារជាតិនៃកម្ពុជា និងធនាគាររដ្ឋវៀតណាម បន្តពង្រឹង និងពង្រីកកិច្ចសហប្រតិបត្តិការទ្វេភាគី ដើម្បីជំរុញការអភិវឌ្ឍវិស័យធនាគាររវាងកម្ពុជា-វៀតណាម ឱ្យកាន់តែល្អប្រសើរថែមទៀត។ នេះបើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី៣០ ខែវិច្ឆិកា ឆ្នាំ២០២៤។

ក្នុងកិច្ចប្រជុំទ្វេភាគីប្រចាំឆ្នាំ២០២៤ នៅទីក្រុងហាណូយ ប្រទេសវៀតណាម លោកជំទាវ ជា សិរី ទេសាភិបាល ធនាគារជាតិកម្ពុជា និងលោកជំទាវ Nguyen Thi Hong ទេសាភិបាល ធនាគាររដ្ឋវៀតណាម បានពិភាក្សាផ្លាស់ប្តូរយោបល់ពីស្ថានភាពសេដ្ឋកិច្ច នយោបាយរូបិយវត្ថុ និងដំណើរការអភិវឌ្ឍវិស័យធនាគារនៃភាគីពីរផងដែរ។

នាឱកាសនោះ លោកជំទាវ ជា សិរី និងលោកជំទាវ Nguyen Thi Hong ក៏បានលើកឡើងអំពីវឌ្ឍនភាពនៃកិច្ចសហប្រតិបត្តិការលើគម្រោងតភ្ជាប់ប្រព័ន្ធទូទាត់ឆ្លងដែន ដែលក្នុងនោះ ថ្នាក់ដឹកនាំធនាគារកណ្តាលទាំងពីរ ក៏បានវាយតម្លៃចំពោះវឌ្ឍនភាពនៃកិច្ចសហប្រតិបត្តិការជាមួយគ្នានាពេលកន្លងមកទៀតផង៕