ភ្នំពេញ៖ ក្រុមហ៊ុន GOMI RECYCLE110 CO., LTD របស់ជប៉ុនដែលមានបទពិសោធជាង ១០ឆ្នាំក្នុងការកែច្នៃ និងគ្រប់គ្រងសំណល់នៅកម្ពុជា បានបង្ហាញពីបំណងចង់សហការជាមួយក្រសួងបរិស្ថានរៀបចំម៉ាស៊ីនកែច្នៃសំរាមប្លាស្ទិក អំបែងដប និងសំណល់ផ្សេងៗទៅជាសម្ភារប្រើប្រាស់ ដើម្បីដាក់លក់និងផ្តល់ថវិកាដែលបានពីការលក់ឧបត្ថម្ភដល់ការសិក្សារបស់សិស្ស-និស្សិតនៅតាមសាលាជនបទ។

ក្នុងជំនួបពិភាក្សាការងារជាមួយលោក Yusuke Okumura ប្រធានក្រុមប្រឹក្សាភិបាលក្រុមហ៊ុន GOMI RECYCLE110 ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក៏បានបង្ហាញពីការគាំទ្រនិងជំរុញឱ្យក្រុមហ៊ុនចាប់ផ្ដើមដាក់ម៉ាស៊ីនកែច្នៃសំរាមស្តង់ដារជប៉ុននេះ នៅតាមស្រុកមួយនៃខេត្តជាតំបន់គោលដៅ ជាការសាកល្បងជាមុនសិន រួចចាំបន្តឱ្យបានពេញក្នុងខេត្តទាំងអស់ ដើម្បីឱ្យក្រុមហ៊ុនទទួលបានជោគជ័យខ្ពស់។

ក្រសួងបរិស្ថាន នឹងផ្តល់សំរាមប្លាស្ទិក និងសំណល់ដែលសិស្សានុសិស្សប្រមូលបានពីយុទ្ធនាការ «កម្ពុជាស្អាត ខ្មែរធ្វើបាន» ឱ្យក្រុមហ៊ុនយកទៅកែច្នៃ ក្នុងនោះការវិនិយោគក្នុងការកែច្នៃសំរាមប្លាស្ទិកនៅតាមតំបន់ឆ្ងាយៗនេះ នឹងជំរុញឱ្យកម្ពុជាស្អាត និងឆ្លើយតបនឹងការប្រែប្រួលអាកាសធាតុ ឈានឆ្ពោះទៅសម្រេចទស្សនវិស័យកម្ពុជាក្លាយជាប្រទេសអព្យាក្រឹតកាបូននៅឆ្នាំ២០៥០។ នេះបើតាមការចុះផ្សាយរបស់ក្រសួងបរិស្ថាន កាលពីថ្ងៃទី១ ខែកក្កដា ឆ្នាំ២០២៥៕