ភ្នំពេញ៖ ក្រសួងពាណិជ្ជកម្ម បានរៀបចំកម្មវិធីទិវាជាតិកម្ពុជា នៅក្នុងព្រឹត្តិការណ៍ពិព័រណ៍ពិភពលោក២០២៥ អូសាកា កាន់សៃ នៅប្រទេសជប៉ុន កាលពីថ្ងៃទី៥ ខែកក្កដា ឆ្នាំ២០២៥ គឺដើម្បីបង្ហាញពីសក្តានុពលសេដ្ឋកិច្ច ពាណិជ្ជកម្ម ការវិនិយោគ ទេសចរណ៍ សិល្បៈវប្បធម៌របស់កម្ពុជា និងបង្កើនកិត្តិនាមកម្ពុជាក្នុងឆាកអន្តរជាតិ។

ពិព័រណ៍ពិភពលោក២០២៥ អូសាកា កាន់សៃ ជប៉ុន ដែលប្រព្រឹត្តទៅរយៈពេល ៦ខែ ចាប់ពីថ្ងៃទី១៣ ខែមេសា ដល់ថ្ងៃទី១៣ ខែតុលា ឆ្នាំ២០២៥ នេះ កម្ពុជា ក៏បានជ្រើសរើស «ប្រាសាទកោះកេរ» ជាស្នូលក្នុងការរៀបចំសាងសង់ពន្លាជាតិកម្ពុជា ដែលបច្ចុប្បន្នពន្លាជាតិនេះ បានទទួលភ្ញៀវជាតិ-ភ្ញៀវអន្តរជាតិចូលទស្សនាប្រមាណ ៨០ម៉ឺននាក់។

ក្នុងកម្មវិធីទិវាជាតិកម្ពុជានេះ ក្រសួងពាណិជ្ជកម្ម បានរៀបចំការសម្តែងសិល្បៈជាច្រើនរួមមាន៖ របាំអប្សរា, ល្ខោនខោល, ឈុតឆាកគុជរី និងគុជរឹង្គ, របាំក្ងោកប៉ៃលីន, របាំព្រះស័ង្គ, របាំគោះត្រឡោក, កម្មវិធីក្បួនដង្ហែរ (National Day’s Parade) ពី The Grand Ring ឆ្ពោះទៅកាន់ពន្លាជាតិកម្ពុជា, កម្មវិធីចុះអនុស្សរណ:នៃការយោគយល់គ្នា និងពិធីលៀងសាយភោជន៍អបអរសាទរកម្មវិធីទិវាជាតិកម្ពុជាផងដែរ។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី០៥ ខែកក្កដា ឆ្នាំ២០២៥៕