ភ្នំពេញ៖ កម្ពុជា បញ្ជាក់ជាថ្មីនូវការប្តេជ្ញាចិត្តរបស់ខ្លួនក្នុងការបន្តពង្រឹងទំនាក់ទំនងទ្វេភាគី និងចំណងមិត្តភាពដ៏យូរអង្វែងជាមួយរុស្ស៊ី ដោយឈរលើស្មារតីគោរពគ្នា និងយោគយល់គ្នាទៅវិញទៅមក។ ការបញ្ជាក់នេះត្រូវបានធ្វើឡើង ក្នុងកិច្ចពិគ្រោះយោបល់នយោបាយទ្វេភាគីលើកទី៣ រវាងក្រសួងការបរទេសនៃប្រទេសទាំងពីរ នៅរាជធានីភ្នំពេញ។

ក្នុងជំនួបធ្វើឡើងនៅថ្ងៃទី២៤ ខែសីហា ឆ្នាំ២០២៦ ដែល ឯកឧត្តម មាស គឹមហេង រដ្ឋលេខាធិការ នៃក្រសួងការបរទេសកម្ពុជា និង ឯកឧត្តម Andrey Rudenko អនុរដ្ឋមន្ត្រីការបរទេសរុស្ស៊ី ធ្វើជាសហប្រធានដឹកនាំកិច្ចពិគ្រោះយោបល់នយោបាយទ្វេភាគីលើកទី៣ រវាងក្រសួងការបរទេសទាំងពីរ នៅរាជធានីភ្នំពេញ ភាគីទាំងពីរបានសម្ដែងការពេញចិត្តចំពោះសកម្មភាពរួមគ្នាដ៏មានអត្ថន័យ ដែលបានរៀបចំឡើងនៅក្នុងឆ្នាំ២០២៦ ដើម្បីអបអរសាទរខួបលើកទី៧០ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសហព័ន្ធរុស្ស៊ី។

បើតាមក្រសួងការបរទេស សហប្រធានទាំងពីរក៏បានពិភាក្សាអំពីការពង្រឹងកិច្ចសហប្រតិបត្តិការលើផ្នែកនយោបាយនិងការទូត ពាណិជ្ជកម្ម និងការវិនិយោគ ការពារជាតិ និងសន្តិសុខ ក៏ដូចជាកិច្ចសហប្រតិបត្តិការដែលមានសក្តានុពល រួមមាន អប់រំ កសិកម្ម បច្ចេកវិទ្យាឌីជីថល និងទេសចរណ៍ ជាដើម៕