ភ្នំពេញ៖ សហភាពអឺរ៉ុប បានផ្តល់ហិរញ្ញប្បទានឥតសំណងចំនួន ៧៩លានអឺរ៉ូ (ប្រមាណ ៨៦លានដុល្លារ) សម្រាប់គាំទ្រកម្មវិធីចំនួន៤ ក្នុងវិស័យសំខាន់ៗ ដើម្បីចូលរួមគាំទ្រដល់ការអភិវឌ្ឍសេដ្ឋកិច្ច ប្រកបដោយចីរភាព និងការបង្កើតការងារបន្ថែមនៅកម្ពុជា។ នេះបើតាមការចុះផ្សាយរបស់ក្រសួងសេដ្ឋកិច្ច និងហិរញ្ញវត្ថុ នាថ្ងៃទី១៣ ខែមីនា ឆ្នាំ២០២៤។

កម្មវិធីចំនួន៤ រួមមាន៖ ១.កម្មវិធីភាពជាដៃគូ ដើម្បីនិរន្តរភាពប្រព័ន្ធកសិកម្ម និងស្បៀងនៅកម្ពុជា (Cambodia Partnership for Sustainable Agriculture and Food Systems - EU CAPSAFE) ទទួលថវិកាពីសហភាពអឺរ៉ុបប្រមាណ ១៨,៤លានដុល្លារ និងសហហិរញ្ញប្បទានពីប្រទេសអាល្លឺម៉ង់ប្រមាណ ៧,៨លានដុល្លារ និងកម្មវិធីទី២ គឺភាពជាដៃគូសហភាពអឺរ៉ុប ដើម្បីការប្រើប្រាស់ថាមពលដោយចីរភាពក្នុងឧស្សាហកម្ម (EU Partnership for Sustainable Energy Practices in Industry) ដែលទទួលបានថវិកាប្រមាណ ៦,៥លានដុល្លារ។

ទី៣.កម្មវិធីភាពជាដៃគូសហភាពអឺរ៉ុប-កម្ពុជា សម្រាប់ការបណ្តុះបណ្តាលបច្ចេកទេស ២០២៤-២០២៧ (Transforming Technical Education EU-Cambodia Partnership 2024–2027) ទទួលបានថវិកាប្រមាណ ៥៣,១លានដុល្លារ និងទី៤.កម្មវិធីភាពជាដៃគូសហភាពអឺរ៉ុប ដើម្បីបើកច្រកទៅកាន់ទីផ្សារសកល និងជំនាញពាណិជ្ជកម្ម (European Union Global Access and Trade Expertise) មានថវិកាសរុបពីសហភាពអឺរ៉ុបប្រមាណ ៧,៦លានដុល្លារ និងសហហិរញ្ញប្បទានពីប្រទេសអាល្លឺម៉ង់ប្រមាណ ៣,៣លានដុល្លារ។

កិច្ចព្រមព្រៀងផ្តល់ជំនួយឥតសំណង សម្រាប់គាំទ្រកម្មវិធីចំនួន៤ ដែលផ្តោតលើការលើកកម្ពស់ខ្សែច្រវាក់តម្លៃប្រកបដោយនិរន្តរភាព, ប្រសិទ្ធភាពថាមពល និងថាមពលកកើតឡើងវិញនៅកម្ពុជា ត្រូវបានចុះហត្ថលេខាដោយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកជំទាវ Iutta Urpilainen ស្នងការអឺរ៉ុប សម្រាប់ភាពជាដៃគូអន្តរជាតិ (European Commissioner for International Partnerships)៕