ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកទឹកចិត្តឱ្យសមាគមសហគ្រិនស្ត្រីកម្ពុជា ស្វែងរកប្រភពធនធានផ្សេងៗ ដើម្បីធានានិរន្តរភាពប្រតិបត្តិការ ព្រមទាំងពង្រឹងសមត្ថភាពសមាជិក ដើម្បីភ្ជាប់អាជីវកម្មសក្តានុពលដឹកនាំដោយស្ត្រី ជាមួយក្រុមហ៊ុនចែកចាយធំៗ ដែលអាចគាំទ្រផ្នែកទីផ្សារ ការធ្វើប្រេនឌីង និងលទ្ធភាពទទួលបានហិរញ្ញប្បទាន។ ឯកឧត្តម ហែម វណ្ណឌី ក៏ជំរុញឱ្យសមាគម បង្កើនកម្រិតជាដៃគូសន្ទនាគោលនយោបាយ ជាមួយក្រសួង-ស្ថាប័ន ដើម្បីរួមចំណែកដល់ការរៀបចំគោលនយោបាយ និងបទប្បញ្ញត្តិ ដែលគាំទ្រដល់ការរីកចម្រើននៃអាជីវកម្ម។

ក្នុងជំនួបជាមួយឯកឧត្តម ហែម វណ្ណឌី គណៈប្រតិភូសមាគមសហគ្រិនស្ត្រីកម្ពុជា បានបង្ហាញវឌ្ឍនភាពការងាររបស់សមាគមសហគ្រិនស្ត្រីកម្ពុជា ក្នុងឆ្នាំ២០២៥ និងផែនការ​ឆ្នាំ២០២៦ ព្រមទាំងស្នើសុំការណែនាំ ដើម្បីសម្របគំនិតផ្តួចផ្តើមរបស់ខ្លួន ជាមួយនឹងបេសកកម្មរបស់​ក្រសួង។ បច្ចុប្បន្ន សមាគមដែលមានអាយុ១៤ឆ្នាំនេះ បានពង្រីកសមាជិករហូតដល់ជាង ១ពាន់នាក់ នៅ​ទូទាំងប្រទេស និងបន្តពង្រីកសាខាតាមបណ្តាខេត្តបន្ថែមទៀត។

ឯកឧត្តម ហែម វណ្ណឌី បានលើកឡើងថា សហគ្រិនស្ត្រីកំពុងដើរតួនាទីកាន់តែសំខាន់ក្នុងការអភិវឌ្ឍសេដ្ឋកិច្ចកម្ពុជា ដែលបេសកកម្មរបស់សមាគម ក្នុងការគាំទ្រកំណើនធុរកិច្ច និងពង្រីកទីផ្សារ មានសហថាមភាពជិតស្និទ្ធជាមួយនឹងការងាររបស់ក្រសួង និងស្ថាប័ន ដូចជាសហគ្រិនខ្មែរ។ ឯកឧត្តម បានបន្ថែមថា សហគ្រិនស្ត្រីកម្ពុជា មានសក្តានុពលដឹកនាំក្នុងវិស័យផលិតកម្ម និងឧស្សាហកម្ម តាមរយៈការលើកកម្ពស់ផលិតភាព និងសមាហរ័ណកាន់តែជ្រៅទៅក្នុងខ្សែច្រវាក់ផ្គត់ផ្គង់នៃឧស្សាហកម្ម​ធំៗ សហគ្រាសដឹកនាំដោយស្ត្រីអាចពង្រីកវិសាលភាព និងប្រកួតប្រជែងបានកាន់តែមានប្រសិទ្ធភាព៕