ភ្នំពេញ៖ បណ្ឌិត សុខ ទូច ប្រធានរាជបណ្ឌិត្យសភាកម្ពុជា ចង់ឱ្យសាលាអន្តរជាតិនានាដែលកំពុងដំណើរការនៅកម្ពុជា បញ្ចូលការសិក្សាភាសាខ្មែរ ទៅក្នុងកម្មវិធីសិក្សារបស់ខ្លួន។ ប្រធានរាជបណ្ឌិត្យសភាកម្ពុជា មើលឃើញថា ការផ្តល់ឱកាសឱ្យសិស្សរៀនភាសាខ្មែរ មិនត្រឹមតែជួយបង្កើនសមត្ថភាពប្រើប្រាស់ភាសាជាតិប៉ុណ្ណោះទេ ប៉ុន្តែថែមទាំងចូលរួមថែរក្សាអត្តសញ្ញាណជាតិ និងវប្បធម៌ខ្មែរផងដែរ។

ថ្លែងក្នុង វេទិកាពិភាក្សាសារព័ត៌មាន ស្តីពី «ការប្រើភាសាខ្មែរនិងអក្ខរាវិរុទ្ធឱ្យបានត្រឹមត្រូវ : នរណាជាអ្នកទទួលខុសត្រូវ?» នៅថ្ងៃទី៣១ សីហា ២០២៦ បណ្ឌិត សុខ ទូច ចង់ឃើញសាលាអន្តរជាតិចូលរួមកាន់តែសកម្មក្នុងការលើកកម្ពស់ការប្រើប្រាស់ភាសាខ្មែរ តាមរយៈការបញ្ចូលមុខវិជ្ជា ឬកម្មវិធីសិក្សាភាសាខ្មែរឱ្យសមស្របទៅនឹងប្រព័ន្ធអប់រំរបស់សាលានីមួយៗ។

លោកបានចាត់ទុកការអភិរក្ស និងការប្រើប្រាស់ភាសាខ្មែរ ជាកិច្ចការដែលត្រូវការការចូលរួមពីគ្រប់ភាគី ជាពិសេសវិស័យអប់រំ ដើម្បីធានាថាភាសាជាតិអាចបន្តប្រើប្រាស់បានយ៉ាងទូលំទូលាយនៅក្នុងសង្គមកម្ពុជា៕