ភ្នំពេញ៖ ធនាគារជាតិនៃកម្ពុជា សាខាខេត្តបាត់ដំបង ប្តូរប្រាក់រៀលថ្មី ដល់ម្ចាស់ហាងលក់ទំនិញ ហេង ឆាយលី ដែលប្រាក់របស់គាត់បានឆេះខូចខាត ដោយសារគ្រោះអគ្គិភ័យ សរុបចំនួន ៦.៣៨៨.៥០០ រៀល ក្នុងបុរីព្រែកមហាទេព ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដោយមិនគិតកម្រៃសេវា។

ការប្តូរប្រាក់រៀលថ្មី នាថ្ងៃទី១៨ ខែវិច្ឆិកា ឆ្នាំ២០២៥ នេះ ធ្វើឡើងដោយអនុលោមតាមលក្ខខណ្ឌជាក្រដាសប្រាក់រៀលពិតប្រាកដ មិនក្លែងក្លាយ និងគោលការណ៍វាយតម្លៃដែលរក្សាទ្រង់ទ្រាយដើមនៃក្រដាសប្រាក់លើសពី ៧០%។

សូមជម្រាបថា សាធារណជន អាចបន្តប្តូរក្រដាសប្រាក់រៀលចាស់ ទក់ ឬរហែក យកប្រាក់រៀលថ្មីដោយមិនគិតកម្រៃសេវា នៅតាមសាខាធនាគារជាតិនៃកម្ពុជា រាជធានី-ខេត្ត ទូទាំងប្រទេស ដែលនៅជិតផ្ទះ រៀងរាល់ម៉ោងធ្វើការ៕