ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC) បានស្នើឱ្យក្រុមហ៊ុន Bayernhafen Nürnberg ពិចារណាដាក់ទុនវិនិយោគលើផ្នែកភស្ដុភារកម្មនៅកម្ពុជា។ បើតាមការចុះផ្សាយកាលពីថ្ងៃទី១២ ខែមិថុនា ឆ្នាំ២០២៤ របស់ CDC ក្រុមហ៊ុនមួយនេះ គឺកំពុងវិនិយោគយ៉ាងមមារញឹកក្នុងការដឹកជញ្ជូន និងភស្ដុភារកម្ម នៅអាល្លឺម៉ង់។

ក្នុងអំឡុងពេលទស្សនកិច្ចមជ្ឈមណ្ឌលដឹកជញ្ជូន Bayernhafen Nürnberg ដើម្បីបញ្ជ្រាបសក្ដានុពលវិនិយោគ និងបច្ចុប្បន្នភាពនៃការអភិវឌ្ឍក្នុងប្រទេសកម្ពុជាដល់វិនិយោគិន ឯកឧត្តម ស៊ុន ចាន់ថុល ក៏បានចុះពិនិត្យមជ្ឈមណ្ឌលដឹកជញ្ជូននិងភស្ដុភារកម្ម និងព្រែកជីក Rhine–Main–Danube របស់អាល្លឺម៉ង់ផងដែរ។ ការចុះពិនិត្យដល់ទីតាំងនេះ ក្នុងគោលបំណងសាកសួរក្រុមហ៊ុនពីបទពិសោធវិនិយោគលើគម្រោងយក្សផ្នែកដឹកជញ្ជូន និងភស្ដុភារកម្ម ពិសេសលើការប្រើប្រាស់ព្រែកជីក ដើម្បីសម្រួលដល់ការដឹកជញ្ជូនពីផ្លូវទឹកមកផ្លូវដែក ដែលនេះមានប្រយោជន៍សម្រាប់កម្ពុជាប្រើប្រាស់ជាទឡ្ហីករណ៍ក្នុងគម្រោងអភិវឌ្ឍន៍ហេដ្ឋារចនាសម្ព័ន្ធពហុមធ្យោបាយ។

Bayernhafen Nürnberg គឺជាមជ្ឈមណ្ឌលដឹកជញ្ជូន និងភស្ដុភារកម្មដ៏សំខាន់បំផុតមួយ ដែលតភ្ជាប់រវាងផ្លូវដែក និងផ្លូវទឹកប្រកបដោយប្រសិទ្ធភាព។ ឧស្សាហកម្មចម្រុះនៅក្នុង Bayernhafen Nürnberg រួមមាន៖ អន្តរមធ្យោបាយដឹកជញ្ជូននិងភស្ដុភារកម្ម ការដឹកជញ្ជូនទំនិញ ការកែច្នៃ ឧស្សាហកម្ម ពាណិជ្ជកម្ម ឃ្លាំង និងការផ្តល់សេវាទាក់ទងនឹងការដឹកជញ្ជូនជាដើម៕