ភ្នំពេញ៖ វេទិកាសហគ្រិនខ្មែរឆ្នាំ២០២៤ នឹងធ្វើឡើងនៅថ្ងៃទី២៤-២៥ ខែវិច្ឆិកា ឆ្នាំ២០២៤ ដែលស្ថិតនៅមជ្ឈមណ្ឌលពិព័រណ៍កោះពេជ្រ។ តាមការចុះផ្សាយរបស់នាយកដ្ឋានសហគ្រាសធុនតូច និងមធ្យម នាថ្ងៃទី១៩ កក្កដា វេទិកាសហគ្រិនខ្មែរឆ្នាំ២០២៤នេះ មានគោលបំណងប្រមូលផ្តុំអ្នកដឹកនាំនៅក្នុងវិស័យសហគ្រាសធុនតូច និងមធ្យម បុគ្គលដែលមានគំនិតច្នៃប្រឌិត និងផលិតផលដែលមាននវានុវត្តន៍ទាំងអស់ឱ្យមកនៅក្នុងវេទិកាតែមួយ។

វេទិកាសហគ្រិនខ្មែរឆ្នាំ២០២៤នេះ ប្រារព្ធឡើងដើម្បីផ្សព្វផ្សាយផលិតផល និងការច្នៃប្រឌិតចុងក្រោយរបស់អ្នកលក់ទៅកាន់ទស្សនិកជនគោលដៅ, បង្កើតបណ្តាញជាមួយអ្នកជំនាញក្នុងវិស័យ និងអតិជនគោលដៅ ពិសេសនឹងទទួលបានការយល់ដឹងអំពីទីផ្សារ និងបន្តនាំមុខនិន្នាការអាជីវកម្ម។

ក្នុងវេទិកាសហគ្រិនខ្មែរឆ្នាំ២០២៤នេះ ម្ចាស់អាជីវកម្ម សហគ្រាស និងក្រុមហ៊ុន អាចក្លាយជាម្ចាស់តូបពិព័រណ៍នេះ ដើម្បីដាក់បង្ហាញផលិតផល ក៏ដូចជាភ្ជាប់ទំនាក់ទំនងជាមួយអតិថិជនគោលដៅ និងស្វែងរកឱកាសសហការជាដៃគូនានាថែមទៀតផង។ គួរជម្រាបថា វេទិកាសហគ្រិនខ្មែរឆ្នាំ២០២៤ មានព្រឹត្តិការណ៍សំខាន់ៗរួមមាន៖ សន្និសីទ ការតាំងពិព័រណ៍ផលិតផល និងផ្សារភ្ចាប់បណ្តាញភាពជាដៃគូ៕