ភ្នំពេញ៖ សាជីវកម្មធានាឥណទានកម្ពុជា (CGCC) បានផ្តល់ការធានាឥណទានចំនួន ២០១,២៦លានដុល្លារ ដល់អាជីវកម្មខ្នាតធំ និងសហគ្រាសធុនមីក្រូ តូច និងមធ្យម(MSMEs) សរុបចំនួន ២៣៦៦ គណនី គិតតាំងពីខែមេសា ឆ្នាំ២០២១ ដល់រហូតដល់ថ្ងៃទី៣០ ខែមិថុនា ឆ្នាំ២០២៤។ នេះបើតាមព្រឹត្តិបត្រវឌ្ឍនភាពនៃការធានាឥណទានដែលចុះផ្សាយ នាថ្ងៃទី១៩ ខែកក្កដា ឆ្នាំ២០២៤។

CGCC បានឱ្យដឹងថា គណនីដែលមានការធានាចំនួន ២៣៦៦គណនីនេះ មានអាជីវកម្មខា្នតធំចំនួន ១៦៣ គណនី និងសហគ្រាសធុនមីក្រូ តូច និងមធ្យម ចំនួន២២០៣ គណនី។ យោងតាមរបាយការណ៍របស់ CGCC បានបញ្ជាក់ថា សន្និធិទំហំនៃការធានាឥណទានមានចំនួន ៩៣,៥៩លានដុល្លារ, សន្និធិឥណទានដែលមានការធានាមានទំហំ ១២៩,២៥លានដុល្លារ។ ចំពោះ ភាគរយនៃឥណទានមិនដំណើរការមានចំនួន ៩,១៨% និងសំណងដែលបានបញ្ចេញមានចំនួន ៦៦៦,៤៤៦ដុល្លារ។

ម្ចាស់អាជីវកម្មដែលបានទទួលបានការគាំទ្រពី CGCC ចំនួន ២២០៣គណនីនេះ មានស្ត្រីចំនួន ១០១៥នាក់ និងមិនមែនស្ត្រីមានចំនួន ១៣៥១នាក់ ដែលប្រភេទឥណទាននោះ ជាឥណទានវិបារូប៍, ឥណទានពាណិជ្ជកម្ម និងឥណទានកម្ចីមានកាលកំណត់។ គួរបញ្ជាក់ថា បេសកកម្មចម្បងរបស់ CGCC គឺផ្តល់ការធានាឥណទានលើកម្ចី ដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុនៅក្នុងប្រទេសកម្ពុជា៕