ភ្នំពេញ៖ សាធារណរដ្ឋកូរ៉េ បានប្តេជ្ញាចិត្តបង្កើនការរួមចំណែកក្នុងផ្នែកហិរញ្ញវត្ថុ តាមរយៈមូលនិធិសហប្រតិបត្តិការ «មេគង្គ-សាធារណរដ្ឋកូរ៉េ» រហូតដល់ ១០លានដុល្លារ ត្រឹមឆ្នាំ២០២៧។ នេះបើតាមសេចក្តីប្រកាសព័ត៌មាន ស្តីពីកិច្ចសហប្រតិបត្តិការមេគង្គ-សាធារណរដ្ឋកូរ៉េ បន្តលើកកម្ពស់ការអភិវឌ្ឍប្រកបដោយចីរភាព និងបរិយាប័ន្ន ក្នុងអនុតំបន់មេគង្គ។

ក្នុងកិច្ចសហប្រតិបត្តិនេះ ឯកឧត្តម សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានបញ្ជាក់ថា សាធារណរដ្ឋកូរ៉េ គឺជាដៃគូគន្លឹះក្នុងការលើកកម្ពស់ការអភិវឌ្ឍប្រកបដោយចីរភាពនៅក្នុងអនុតំបន់ តាមរយៈជំនួយអភិវឌ្ឍន៍ផ្លូវការ និងការរួមវិភាគទានប្រចាំឆ្នាំដល់មូលនិធិសហប្រតិបត្តិការមេគង្គ-សាធារណរដ្ឋកូរ៉េ។ សហប្រតិបត្តិការ មេគង្គ-សាធារណរដ្ឋកូរ៉េនេះ គឺបានរួមចំណែកយ៉ាងសំខាន់ក្នុងការពង្រឹងការតភ្ជាប់អនុតំបន់ លើកកម្ពស់ការប្រកួតប្រជែង កាត់បន្ថយគម្លាតអភិវឌ្ឍន៍ក្នុងចំណោមបណ្ដាប្រទេសក្នុងអនុតំបន់មេគង្គ និងកសាងសហគមន៍ប្រកបដោយភាពធន់ជាងមុន។

តាមការចុះផ្សាយរបស់ក្រសួងការបរទេស នាថ្ងៃទី២៩ ខែកក្កដា ឆ្នាំ២០២៤ បានឱ្យដឹងថា ទិសដៅអនាគតនៃកិច្ចសហប្រតិបត្តិការខាងលើនេះ គឺផ្តោតលើវិស័យអាទិភាពមួយចំនួន ដូចជា៖ ១.ការអភិវឌ្ឍធនធានមនុស្ស, ២.ការបន្សំនឹងការប្រែប្រួលអាកាសធាតុ និងការគ្រប់គ្រងធនធានធម្មជាតិ, ៣.កិច្ចសហប្រតិបត្តិការកសិកម្ម និងអភិវឌ្ឍន៍ជនបទ, ៤.ការរួមគ្នាដោះស្រាយបញ្ហាសន្តិសុខមិនប្រពៃណី និង ៥.លើកកម្ពស់ការផ្លាស់ប្តូររវាងប្រជាជននិងប្រជាជន នឹងលើកកម្ពស់ការអភិវឌ្ឍប្រកបដោយចីរភាព និងបរិយាប័ន្ននៅក្នុងអនុតំបន់៕