ភ្នំពេញ៖ សាច់បង្កកដែលជាទំនិញហាមឃាត់នាំចូលពីប្រទេសថៃ ប្រេស៊ីល និងហូឡង់ ចំនួន ២០៥កេស ស្មើនឹង ២ ០៥០គីឡូក្រាម ត្រូវបានមន្ត្រីជំនាញ ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) សាខារាជធានីភ្នំពេញ ដុតកម្ទេចចោល នាថ្ងៃទី១៥ ខែសីហា ឆ្នាំ២០២៤។

បើតាមក្រសួងពាណិជ្ជកម្ម ចេញផ្សាយនាថ្ងៃទី១៦ សីហា សាច់បង្កកជាង ២តោននេះ មានដូចជា៖ គូទមាន់, ចុងស្លាបមាន់ និងឆ្អឹងមាន់ដែលនាំចូលមកពីប្រទេសថៃ មានចំនួន ១ ២២០គីឡូក្រាម, កោះមាន់ ដែលនាំចូលពីប្រទេសប្រេស៊ីល មានចំនួន ៣៦០គីឡូក្រាម និងស្លឹកត្រចៀកជ្រូក ផលិតនៅប្រទេសហូឡង់ ចំនួន ១០០គីឡូក្រាម។

សាច់បង្កក ដែលជាទំនិញហាមឃាត់នេះ ត្រូវបានមន្ត្រី ក.ប.ប. សហការជាមួយមន្ត្រីគយ និងរដ្ឋាករ នៃការិយាល័យស្រាវជ្រាវនិងបង្ក្រាបអំពើរត់ពន្ធតំបន់១ និងមន្ត្រីកងរាជអាវុធហត្ថលើផ្ទៃប្រទេស ដកហូតពីឃ្លាំងមួយកន្លែងក្នុងរាជធានីភ្នំពេញ៕