ភ្នំពេញ៖ កម្ពុជា ប្តេជ្ញាចិត្តសហការជាមួយរដ្ឋជាសមាជិកអាស៊ានទាំងអស់ ទទួលបានអត្ថប្រយោជន៍នៃរបបសន្តិសុខសង្គមដល់ពលករទេសន្តរប្រវេសន៍នៃបណ្ដាប្រទេសអាស៊ាន ដោយមិនគិតពីការបម្លាស់ទីនៅក្នុងតំបន់ ដែលស្របនឹងមូលបទរបស់ប្រទេសសិង្ហបុរី ឆ្នាំនេះ គឺ «ការពង្រឹងភាពធន់ និងការលើកកម្ពស់នវានុវត្តន៍»។

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានលើកឡើងថា គំនិតផ្ដួចផ្ដើមនេះ មិនត្រឹមតែជួយពង្រឹងសាមគ្គីភាព និងបរិយាប័នរបស់អាស៊ានប៉ុណ្ណោះទេ ប៉ុន្តែថែមទាំងបញ្ជាក់ពីភាពជាអ្នកដឹកនាំរបស់អាស៊ាននៅលើឆាកអន្ដរជាតិ ពិសេសក្នុងការលើកកម្ពស់ស្តង់ដារការងារប្រកបដោយសុខុមាលភាពនៅក្នុងតំបន់ផងដែរ។ នេះបើតាមការចុះផ្សាយរបស់ក្រសួងការងារ នាថ្ងៃទី៣០ ខែតុលា ឆ្នាំ២០២៤។

ឯកឧត្តម ហេង សួរ ក៏លើកឡើងពីវឌ្ឍនភាពនៃគោលការណ៍ណែនាំអាស៊ាន ស្តីពីចល័តភាពនៃអត្ថប្រយោជន៍របបសន្តិសុខសង្គមសម្រាប់ទេសន្តរប្រវេសករ ក្នុងតំបន់អាស៊ាន ដែលត្រូវបានប្រមុខដឹកនាំអាស៊ានកត់សម្គាល់នៅក្នុងកិច្ចប្រជុំកំពូលអាស៊ានលើកទី៤៤ និង៤៥ និងកិច្ចប្រជុំកំពូលពាក់ព័ន្ធ នៅប្រទេសឡាវ។ ឯកឧត្តម ហេង សួរ ថ្លែងដូច្នេះក្នុងកិច្ចប្រជុំរដ្ឋមន្រ្តីការងារអាស៊ានលើកទី២៨ (28th ASEAN Labour Ministers' Meeting - ALMM) និងកិច្ចប្រជុំពាក់ព័ន្ធ ក្រោមមូលបទ «ការពង្រឹងភាពធន់ និងការលើកកម្ពស់នវានុវត្តន៍» នៅប្រទេសសិង្ហបុរី។

នៅក្នុងកិច្ចប្រជុំដ៏សំខាន់នេះដែរ រដ្ឋមន្រ្តី/តំណាងប្រតិភូការងារមកពីបណ្ដាប្រទេសជាសមាជិកអាស៊ាន បានកំណត់ទិសដៅឱ្យឯកឧត្តមមន្រ្ដីការងារអាស៊ាន (SLOM) ពិភាក្សាលម្អិតលើយន្ដការអនុវត្តបានយ៉ាងពេញលេញនូវគោលការណ៍ ដូចមាននៅក្នុងសេចក្តីថ្លែងការណ៍រួម (Joint Communique) នៃកិច្ចប្រជុំរដ្ឋមន្រ្តីការងារអាស៊ានលើកទី២៨ និងកិច្ចប្រជុំពាក់ព័ន្ធ ឆ្នាំនេះ។ គួរបញ្ជាក់ថា កិច្ចប្រជុំនេះ រដ្ឋមន្រ្តីការងារនៃបណ្ដាប្រទេសអាស៊ាន បានអនុម័ត «សេចក្តីថ្លែងការណ៍រួម (Joint Communique) នៃកិច្ចប្រជុំរដ្ឋមន្រ្តីការងារអាស៊ានលើកទី២៨ និងកិច្ចប្រជុំពាក់ព័ន្ធ» ដែលជាឯកសារគោលក្នុងការអនុវត្តការងារបន្ដក្នុងរយៈពេល ២ឆ្នាំទៅមុខ៕