ភ្នំពេញ៖ ការសន្សំប្រាក់ នឹងជួយសម្រួលតម្រូវការចាំបាច់ក្នុងស្ថានភាពបន្ទាន់ ពិសេសចូលរួមពង្រឹងការគ្រប់គ្រងហិរញ្ញវត្ថុ ឬហៅថាការចាត់ចែងការចំណាយប្រចាំថ្ងៃ កាន់តែប្រសើរឡើង។ នេះជាការលើកឡើងរបស់លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA) ដោយគូសបញ្ជាក់ថា ការសន្សំប្រាក់ ជារឿងមួយដែលត្រូវតែយកចិត្តទុកដាក់ និងចូលរួមអនុវត្តឱ្យមានប្រសិទ្ធភាព។

ក្នុងសិក្ខាសាលាផ្សព្វផ្សាយស្តីអំពី«ទិវាសន្សំអាស៊ាន» ក្រោមប្រធានបទ៖«សារសំខាន់នៃការសន្សំប្រាក់តាំងពីវ័យកុមារ» លោកជំទាវ ឌិត នីតា បន្តថា សមាគមមីក្រូហិរញ្ញវត្ថុកម្ពុជា ធនាគារជាតិ ដៃគូ និងគ្រឹះស្ថានសមាជិក នឹងលើកម្ពស់ចំណេះដឹងហិរញ្ញវត្ថុ ពាក់ព័ន្ធនឹងការបង្កើតវប្បធម៌សន្សំដល់សាធារណៈជន តាមរយៈគម្រោង យុទ្ធនាការ និងបង្កើតមាតិកាសង្គមជាច្រើនទម្រង់ ដើម្បីផ្សព្វផ្សាយជាប្រចាំលើបណ្តាញសង្គមរបស់សមាគម និងគ្រឹះស្ថានជាសមាជិករបស់សមាគម។

សិក្ខាសាលាដែលរៀបចំឡើង ដើម្បីផ្សព្វផ្សាយអំពីសារសំខាន់នៃការសន្សំប្រាក់ និងចូលរួមលើកកម្ពស់វប្បធម៌សន្សំប្រាក់ក្នុងចំណោមសាធារណជនឱ្យកាន់តែប្រសើរ កាលពីថ្ងៃទី៣១ ខែតុលា ឆ្នាំ២០២៤ នេះ ចូលរួមដោយឯកឧត្ដម កង វណ្ណារ៉ូ អភិបាលរងនៃគណៈអភិបាលខេត្តកំពង់ស្ពឺ, លោក រ័ត្ន សោភ័ណ ប្រធានសមាគមធនាគារ, គ្រឹះស្ថានធនាគារ និងហិរញ្ញវត្ថុ និងសិក្សានុសិស្ស ជនបង្គោលនៃគម្រោងសុវត្ថិភាពហិរញ្ញវត្ថុ និងសាធារណជនជាច្រើននាក់ផងដែរ៕