ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា(CDC) និងសភាពាណិជ្ជកម្ម និងឧស្សាហកម្មនៃសាធារណរដ្ឋស៊ែប៊ី នឹងទាក់ទាញវិនិយោគទ្វេទិស ដើម្បីឱ្យសហគ្រាសមកពីប្រទេសក្នុងតំបន់ Balkans មកបណ្តាក់ទុនវិនិយោគនៅកម្ពុជា នាពេលខាងមុខ។ នេះបើតាមការចុះផ្សាយរបស់ CDC នាថ្ងៃទី៥ ខែធ្នូ ឆ្នាំ២០២៤។

គណៈប្រតិភូសភាពាណិជ្ជកម្ម និងឧស្សាហកម្មស៊ែប៊ី ដែលដឹកនាំដោយ ឯកឧត្តម តាន់ ប៊ុនប៉ា ឯកអគ្គរាជទូតវិសាមញ្ញ និងពេញសមត្ថភាពកម្ពុជាប្រចាំស៊ែប៊ី និងលោកស្រី Jovana Majstorovic ប្រធានមជ្ឈមណ្ឌលទទួលបន្ទុកកិច្ចការអាស៊ី, សហព័ន្ធរុស្ស៊ី និងសហធនរដ្ឋឯករាជ្យ ស្នើឱ្យកម្ពុជា ពិនិត្យលទ្ធភាពសហការរៀបចំជំនួបធុរកិច្ចក្នុងឱកាសពិព័រណ៍ពិភពលោកអូសាកា២០២៥ នៅជប៉ុន និង Expo Belgrade ២០២៧ នៅប្រទេសស៊ែប៊ី។ ការស្នើបែបនេះរបស់គណៈប្រតិភូសភាពាណិជ្ជកម្ម មានគោលបំណងលើកកម្ពស់ការឈ្វេងយល់ពីបច្ចុប្បន្នភាពថ្មីនៃសក្តានុពល និងបរិយាកាសវិនិយោគនៅកម្ពុជា ដល់សហគមន៍ធុរកិច្ចក្នុងតំបន់ Balkans។

ក្នុងកិច្ចពិភាក្សា ដើម្បីលើកកម្ពស់កិច្ចសហការទ្វេភាគី និងឈ្វេងយល់អំពីបច្ចុប្បន្នភាពថ្មី នៃសក្តានុពល និងបរិយាកាសវិនិយោគនៅកម្ពុជានេះ ឯកឧត្ដម សួន សុផល ក៏បានលើកឡើងពីសាវតារនៃការរៀបចំតាក់តែងបទប្បញ្ញត្តិ និងគោលនយោបាយពាក់ព័ន្ធនឹងការវិនិយោគ ដែលរាជរដ្ឋាភិបាលតែងតែកែលម្អជាប្រចាំ សំដៅផ្តល់កិច្ចសម្រួល ការលើកទឹកចិត្ត និងការថែទាំដល់វិនិយោគិនជាតិ និងអន្តរជាតិ ឱ្យកាន់តែមានភាពទាក់ទាញ និងអំណោយផលខ្ពស់៕