ភ្នំពេញ៖ ស្ថានទូតជប៉ុនប្រចាំកម្ពុជា បានចុះហត្ថលេខាផ្តល់ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិរបស់ជប៉ុនចំនួន ១៩២,៥០៩ ដុល្លារ ដល់គម្រោងអប់រំចំនួន ២នៅកម្ពុជា កាលពីថ្ងៃទី២៤ ខែមករា ឆ្នា២០២៥។ ជំនួយនេះ ត្រូវបានចុះហត្ថលេខាដោយឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា។

ជំនួយឥតសំណងចំនួន ១៩២,៥០៩ដុល្លារនេះ ត្រូវបានផ្តល់ឱ្យអង្គការក្តីសង្ឃឹមលូថេរ៉ានកម្ពុជាចំនួន ៩២,១៩១ដុល្លារ ដើម្បីសាងសង់សាលាបឋមសិក្សាមួយខ្នងមាន ៦បន្ទប់ បង្គន់អនាម័យមួយមាន៥ បន្ទប់ កន្លែងលាងសម្អាតដៃមួយកន្លែង និងគ្រឿងបរិក្ខារសាលារៀនមួយចំនួននៅសាលាបឋមសិក្សាគល់ទទឹង ក្នុងស្រុកភ្នំក្រវាញ ខេត្តពោធិ៍សាត់។ គម្រោងនេះ មានគោលបំណងចូលរួមចំណែកលើកកម្ពស់បរិយាកាសសិក្សាប្រកបដោយគុណភាព និងសុវត្ថិភាពដល់សិស្សានុសិស្សនៅក្នុងសហគមន៍។

រីឯមួយគម្រោងទៀត ត្រូវប្រគល់ឱ្យមន្ទីរអប់រំ យុវជន និងកីឡាខេត្តបន្ទាយមានជ័យ ដែលមានថវិការចំនួន ១០០,៣១៨ដុល្លារ ត្រូវសាងសង់អគារសិក្សា១ខ្នង ៥បន្ទប់ បំពាក់ដោយគ្រឿងសង្ហារឹម បង្គន់អនាម័យ១ខ្នង ៤បន្ទប់ និងកន្លែងលាងសម្អាតដៃចំនួន១ នឹងត្រូវសាងសង់នៅសាលាបឋមសិក្សាភូមិថ្មី ក្នុងស្រុកអូរជ្រៅ ខេត្តបន្ទាយមានជ័យ។ គម្រោងនេះ មានគោលបំណងនាំមកនូវបរិស្ថានសិក្សាដែលមានសុវត្ថិភាព និងផាសុកភាពជាងមុន៕