ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ ដឹកនាំយុទ្ធនាការហែលទឹកទន្លេមេគង្គ ចម្ងាយ ១២០គីឡូម៉ែត្រ ដើម្បីលើកកម្ពស់ការយល់ដឹង និងចូលរួមកៀរគរមូលនិធិសម្រាប់ការអភិរក្សសត្វផ្សោត ដែលជាប្រភេទជិតផុតពូជនៅកម្ពុជា។ បើតាមការចុះផ្សាយរបស់ក្រសួងកសិកម្ម ព្រឹត្តិការណ៍នេះនឹងធ្វើឡើងក្នុងរយៈពេល៤ ថ្ងៃគឺចាប់ពីថ្ងៃទី ១៧ ដល់ ២០ ខែមីនា ឆ្នាំ២០២៥។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម លើកឡើងថា ក្រសួងកសិកម្ម គាំទ្រពេញទំហឹងចំពោះគំនិតផ្តួចផ្តើមរៀបចំយុទ្ធនាការហែលទឹកទន្លេមេគង្គនេះ ដោយក្រសួងកំពុងធ្វើការក្នុងទិសដៅអភិរក្សសត្វផ្សោតទន្លេមេគង្គនេះផងដែរ។ ឯកឧត្តម ឌិត ទីណា បានបន្តថា លទ្ធផលបានបង្ហាញហើយថា រយៈពេល៣ឆ្នាំចុងក្រោយនេះ ចំនួនសត្វផ្សោតទន្លេមេគង្គនៅតែបន្តកើនឡើង ហើយនេះ គឺជាភស្តុតាងដែលបង្ហាញពីការប្តេជ្ញាចិត្ត និងកម្មវិធីអភិរក្សប្រកបដោយប្រសិទ្ធភាព។

ជាមួយគ្នានេះ លោក ចាប វិបុល នាយកអង្គការ WWF-កម្ពុជា មានប្រសាសន៍ថា ការការពារចំនួនសត្វផ្សោត គឺទាមទារវិធីសាស្ត្រ និងការចូលរួមទាំងអស់គ្នា ពីអ្នកអភិរក្ស អ្នកបង្កើតគោលនយោបាយ និងសហគមន៍មូលដ្ឋាន។ លោក ចាប វិបុល បន្តថា យុទ្ធនាការហែលទឹកទន្លេមេគង្គនេះ គឺជាសក្ខីភាពនៃកិច្ចការសហការ និងការចូលរួមជាសាធារណៈក្នុងការអភិរក្សផងដែរ។

គួរបញ្ជាក់ថា យុទ្ធនាការហែលទឹកទន្លេមេគង្គខាងលើ ដឹកនាំដោយក្រសួងកសិកម្ម និងមានការគាំទ្រពី រដ្ឋបាលជលផល អង្គការ WWF-កម្ពុជា អង្គការក្រុមអភិវឌ្ឍន៍ជនបទកម្ពុជា គណៈកម្មការថនិកសត្វសមុទ្រ សហរដ្ឋអាម៉េរិក កម្មវិធីស្រាវជ្រាវសត្វ ផ្សោត Sarasota នៅសួនសត្វ Brookfield ក្នុងទីក្រុង Chicago សហរដ្ឋអាម៉េរិក, IUCN Cetacean Specialist Group និង Ocean Conservation Namibia៕