ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានលើកទឹកចិត្តឱ្យធនាគារអេស៊ីលីដា ភីអិលស៊ី ពិនិត្យលទ្ធភាពក្នុងការផ្តល់ប្រាក់កម្ចីដែលមានអត្រាការប្រាក់សមរម្យដល់សហគមន៍ទេសចរណ៍ និងជួយផ្សព្វផ្សាយតំបន់សក្តានុពលទេសចរណ៍តាមរយៈ Website ACLEDA និង App របស់ធនាគាររបស់ ACLEDA។

ក្នុងជំនួបជាមួយឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ក៏បានពិភាក្សាពីការផ្តល់សេវាកម្មឌីជីថលរបស់ធនាគារ អេស៊ីលីដា ភីអិលស៊ី លើការពិនិត្យលទ្ធភាពក្នុងការគាំទ្រវិស័យទេសចរណ៍ តាមរយៈការផ្តល់កម្ចីសម្រាប់ជួយដល់វិស័យទេសចរណ៍សណ្ឋាគារ ជាពិសេសតំបន់ក្នុងគម្រោងយុទ្ធសាស្រ្តផែនការមេរបស់រដ្ឋាភិបាល រួមមាន៖ សៀមរាប ក្រុងព្រះសីហនុ កែប មណ្ឌលគីរី។

កិច្ចប្រជុំនេះ ភាគីទាំងពីរ ក៏លើកឡើងពីកិច្ចសហការចំពោះសហគមន៍ទេសចរណ៍ ដែលមានការលក់ដូរផ្សេងៗឱ្យមានការប្រើប្រាស់ KHQR របស់ធនាគារ នឹងមានផ្តល់កម្ចី (Merchant OD សំដៅដល់កម្ចី) សម្រាប់ធ្វើអាជីវកម្មផងដែរ៕