ភ្នំពេញ៖ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងឯកឧត្តម Charles HAY ប្រធានផ្នែកអាស៊ីអាគ្នេយ៍ និងប៉ាស៊ីហ្វិក នៃក្រសួងការបរទេសចក្រភពអង់គ្លេស ពិភាក្សាអំពីកិច្ចសហប្រតិបត្តិការទ្វេភាគីក្នុងវិស័យពាណិជ្ជកម្ម ធុរកិច្ច និងវិនិយោគ ក្រោមក្របខ័ណ្ឌនៃវេទិកាពាណិជ្ជកម្ម និងវិនិយោគ រវាងប្រទេសទាំងពីរ។

បើតាមការចុះផ្សាយរបស់ ក្រសួងពាណិជ្ជកម្ម កាលពីថ្ងៃទី១៤ ខែឧសភា ឆ្នាំ២០២៥ កិច្ចពិភាក្សាខាងលើនេះ ធ្វើឡើងក្នុងជំនួបទទួលទានអាហាពេលល្ងាច កាលពីថ្ងៃទី១៣ ឧសភា រវាងឯកឧត្តម សំហេង បូរ៉ា ជាមួយនិងឯកឧត្តម Charles HAY រួមទាំងមានការចូលរួមពី ឯកឧត្តម ណាំ លីណាល់ អនុរដ្ឋលេខាធិការក្រសួងពាណិជ្ជកម្ម ឯកឧត្តម Dominic WILLIAMS ឯកអគ្គរាជទូតចក្រភពអង់គ្លេសប្រចាំកម្ពុជា និងសហការី ព្រមទាំងមន្ត្រីជំនាញនៃក្រសួងពាណិជ្ជកម្ម ជាច្រើនរូប ផងដែរ៕