ភ្នំពេញ៖ ក្រសួងទេសចរណ៍កម្ពុជា និងស្ថាប័នទេសចរណ៍ខេត្ត Gyeonggi ដែលជាខេត្តដ៏ធំ និងមានប្រជាជនច្រើនជាងគេក្នុងប្រទេសកូរ៉េ ពិនិត្យលទ្ធភាពចុះអនុស្សរណៈនៃការយោគយល់គ្នា (MoU) ស្តីពីកិច្ចសហប្រតិបត្តិការទេសចរណ៍ ដើម្បីជំរុញការផ្លាស់ប្តូរប្រជាជន និងប្រជាជន និងស្វែងយល់ពីវប្បធម៌ប្រពៃណីទំនៀមទម្លាប់គ្នាទៅវិញទៅមក។

បើតាមការចុះផ្សាយរបស់ក្រសួងទេសចរណ៍ ការចុះអនុស្សរណៈនៃការយោគយល់គ្នានេះ ក៏មានគោលបំណងបង្កើតកិច្ចសហការស្វែងរកគោលដៅទេសចរណ៍ ដែលមានលក្ខណៈពិសេសធម្មជាតិ និងបេតិកភណ្ឌផងដែរ។ ក្នុងកិច្ចពិភាក្សា កាលពីថ្ងៃទី៥ ខែមិថុនា ឆ្នាំ២០២៥ ជាមួយ លោក Jo Won-Yong នាយកប្រតិបត្តិស្ថាប័នទេសចរណ៍ខេត្ត Gyeonggi ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានលើកឡើងពីសភាពការណ៍ពិតពាក់ព័ន្ធនយោបាយ សេដ្ឋកិច្ច សន្តិសុខ និងសណ្តាប់ធ្នាប់សាធារណៈដ៏ល្អប្រសើរដែលកម្ពុជាមាន។

ឯកឧត្តម ហួត ហាក់ ក៏បង្ហាញពីសក្តានុពលទេសចរណ៍ដ៏សំបូរបែបរបស់កម្ពុជា ដូចជាប្រាង្គប្រាសាទរាប់ពាន់នៅពាសពេញផ្ទៃប្រទេស គោលដៅទេសចរណ៍ដ៏សំបូរបែប រួមមានតំបន់អេកូទេសចរណ៍ដ៏ស្រស់បំព្រង ឆ្នេរសមុទ្រមានខ្សាច់សម៉ដ្ឋដូចមាស ដែលជាទីគាប់ចិត្តរបស់អ្នកទេសចរគ្រប់វ័យ និងគ្រប់រសនិយម៕