ភ្នំពេញ៖ ក្រសួងទេសចរណ៍ នឹងរៀបចំ «ទិវាយោគៈអន្តរជាតិ លើកទី១១» នៅខេត្តសៀមរាប និងរាជធានីភ្នំពេញ ដើម្បីផ្សព្វផ្សាយអំពីទេសចរណ៍សុខុមាលភាព (Wellness Tourism) ការធ្វើលំហាត់ប្រាណសមាធិ ទាំងផ្លូវកាយ ផ្លូវចិត្ត សម្រួលចលនាសាច់ដុំ និងចលនាសរសៃឈាម សម្រាប់សុខុមាលភាពរាងកាយ ដែលនឹងរួមចំណែកផ្សព្វផ្សាយពីសក្តានុពលទេសចរណ៍សំខាន់ៗ ក៏ដូចជាវប្បធម៌ដ៏ល្អឯករបស់កម្ពុជា ទៅកាន់ទេសចរជាតិ និងអន្តរជាតិ។

ក្រោមការសហការរៀបចំរវាងក្រសួងទេសចរណ៍ ជាមួយស្ថានទូតឥណ្ឌាប្រចាំកម្ពុជា «ទិវាយោគៈអន្តរជាតិ លើកទី១១» នេះ នឹងជួយជំរុញកិច្ចសហប្រតិបត្តិការកម្ពុជា-ឥណ្ឌា ឱ្យកាន់តែរឹងមាំថែមទៀត ស្របពេលដែលឆ្នាំ២០២៥ ត្រូវបានបន្តជា «ឆ្នាំទេសចរណ៍កម្ពុជា-ឥណ្ឌា» ដើម្បីជំរុញផ្សព្វផ្សាយពីយុទ្ធនាការទេសចរណ៍ក្នុងរដូវកាលបៃតង(Green Season)។ ទិវាយោគៈអន្តរជាតិ លើកទី១១ នឹងធ្វើឡើងនាថ្ងៃទី១៩ ខែមិថុនា ក្នុងបរិវេណមុខព្រះលានជល់ដំរី ខេត្តសៀមរាប នឹងនៅថ្ងៃទី២១ ខែមិថុនា នាបរិវេណសួនច្បារមុខ វត្តបទុមវតី រាជធានីភ្នំពេញ វេលាម៉ោង០៦:៣០នាទីព្រឹកដូចគ្នា។

ទន្ទឹមនឹងនេះ ក្រសួងទេសចរណ៍ ជំរុញឱ្យភ្ញៀវទេសចរជាតិ និងអន្តរជាតិ ចូលរួមធ្វើលំហាត់កាយសុខភាពក្នុងព្រឹត្តិការណ៍ខាងលើឱ្យបានច្រើនកុះករ និងដោយសេរី។ ចំពោះ ព័ត៌មានបន្ថែម ភ្ញៀវទេសចរជាតិ និងអន្តរជាតិ អាចទាក់ទងទៅកាន់នាយកដ្ឋានសិក្សាទីផ្សារ និងផ្សព្វផ្សាយទេសចរណ៍ ក្រៅប្រទេស នៃក្រសួងទេសចរណ៍ តាមរយៈទូរសព្ទលេខ៖ ០៩៦ ២៦៥ ៥៥៥៥ និង ០៨៩ ៥៤៤ ៩៦៤។ នេះបើយោងតាមសេចក្តីជូនដំណឹងរបស់ក្រសួងទេសចរណ៍៕