ភ្នំពេញ៖ ក្រុមហ៊ុន Dongbaishan Holding Group Co., Ltd. and its subsidiaries បោះទុនប្រមាណ៥០០លានដុល្លារ ដើម្បីសាងសង់រោងចក្រផលិតថាមពលពន្លឺព្រះអាទិត្យ (សឡា) ក្នុងខេត្តកំពង់ស្ពឺ។ នេះបើតាមការលើកឡើងរបស់ លោក Si Juchen ម្ចាស់ក្រុមហ៊ុនចិន Dongbaishan Holding Group Co., Ltd. and its subsidiaries។

រោងចក្រផលិតថាមពលពន្លឺព្រះអាទិត្យខាងលើ ដែលវិនិយោគរួមគ្នាដោយ ក្រុមហ៊ុន Dongbaishan Holding Group សហការជាមួយសមាគមសហគមន៍អភិវឌ្ឍន៍កម្ពុជា ចិន និងក្រុមហ៊ុន SL sunligth green energy sorlapower co.ltd នឹងអាចផ្តល់ឱកាសការងារដល់ប្រជាពលរដ្ឋក្នុងខេត្តកំពង់ស្ពឺនេះ ក្នុងរង្វង់ពី ១៥០០នាក់ ទៅ ៣០០០នាក់។ រោងចក្រផលិតថាមពលពន្លឺព្រះអាទិត្យនេះផងដែរ នឹងចាប់ផ្តើមនៅកំឡុងពាក់កណ្តាលខែកក្កដា ឆ្នាំ២០២៥ លើផ្ទៃដីប្រមាណជិត ៦០០ហិកតា ហើយក្រុមហ៊ុន Dongbaishan Holding Group បានដំណើរការរយៈពេលជាង ២០ឆ្នាំមកហើយ នៅប្រទេសចិន។

ឯកឧត្តម ជាម ច័ន្ទសោភ័ណ អភិបាលខេត្តកំពង់ស្ពឺ បានបង្ហាញពីការគ្រាំទ្រចំពោះការវិនិយោគលើផ្នែកថាមពលកកើតឡើងវិញតែមួយគត់នៅក្នុងខេត្តកំពង់ស្ពឺ និងបានសន្យាផ្តល់ការគាំទ្រ និងសម្របសម្រួលគ្រប់បែបយ៉ាង ចំពោះផ្នែកច្បាប់ និងនីតិវិធីផ្សេងៗ ដើម្បីឱ្យដំណើរការនៃរោងចក្រនេះប្រព្រឹត្តិបានរលូន។គួរបញ្ជាក់ថា បច្ចុប្បន្ន ខេត្តកំពង់ស្ពឺ មានរោងចក្រ សហគ្រាសប្រមាណ ២៤៤២រោងចក្រ សហគ្រាស ក្នុងនោះមានអ្នកវិនិយោគប្រមាណជាង ៩០% ជាជនជាតិចិន៕