ភ្នំពេញ៖ នាឱកាសពិធីចូលឆ្នាំចិន-វៀតណាម រយៈពេល៣ថ្ងៃ កម្ពុជា ទទួលបានភ្ញៀវទេសចរសរុប ១ ០៥១ ៤៧២នាក់ ដែលក្នុងនោះភ្ញៀវទេសចរជាតិមានចំនួន៩៩៣ ៩៩១នាក់ និងភ្ញៀវទេសចរអន្តរជាតិសរុបចំនួន៥៧ ៤៨១នាក់។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នៅថ្ងៃទី១២ ខែកុម្ភៈ ឆ្នាំ២០២៤នេះ។

បើតាមការចុះផ្សាយដដែល ក្នុងរយៈពេល៣ថ្ងៃ នៃពិធីចូលឆ្នាំចិន-វៀតណាម ពោលគឺចាប់ពីថ្ងៃទី០៩ ដល់១១ ខែកុម្ភៈនេះ ខេត្តដែលទទួលបានភ្ញៀវទេសចរច្រើនជាងគេ រួមមាន៖ ខេត្តព្រះសីហនុ ទទួលបានភ្ញៀវទេសចរទៅលេងកម្សាន្តចំនួន ២៩៤ ៣០១នាក់ ខណៈដែលខេត្តសៀមរាបទទួលបានភ្ញៀវទេសចរសរុប ១១៧ ៦៧៧នាក់។ ខេត្តបាត់ដំបងវិញ មានភ្ញៀវទេសចរទៅកម្សាន្តនៅរមណីយដ្ឋានទេសចរណ៍នានាប្រមាណ ៨៩ ៤៤៦នាក់។ 

ចំណែក ខេត្តប៉ៃលិន មានភ្ញៀវទេសចរទៅទស្សនាសរុបចំនួន ៧៩ ៦៩៣នាក់ និងខេត្តកែប មានភ្ញៀវទេសចរជាតិ និងភ្ញៀវទេសចរអន្តរជាតិសរុបចំនួន ៧៣ ១៤៥នាក់ ខណៈខេត្តកណ្តាល មានទេសចរទៅកម្សាន្តនៅរមណីយដ្ឋានទេសចរណ៍នានាប្រមាណ ៧១ ២៧៣នាក់ និងនៅមានខេត្តផ្សេងទៀត ភ្ញៀវទេសចរទៅលេងកម្សាន្តតាមគោលដៅផ្សេងៗជាច្រើនទៀត៕