ភ្នំពេញ៖ ផ្លូវថ្មើរជើងចតុមុខ រាជធានីភ្នំពេញ (Walk Street) នៅថ្ងៃទី១៨-១៩ ខែតុលា ឆ្នាំ២០២៥ នឹងមានកម្មវិធីជជែកលើវិថីទេសចរណ៍ ក្រោមប្រធានបទ «សិល្បៈជាជ្រុងមួយនៃទេសចរណ៍» និង «ទេសចរណ៍សម័យបច្ចេកវិទ្យា» ដែលរៀបចំឡើងដើម្បីចូលរួមយុទ្ធនាការជំរុញផ្សព្វផ្សាយសក្តានុពលទេសចរណ៍កម្ពុជាគ្រប់រដូវកាល ក៏ដូចជារដូវកាលបៃតង ទៅកាន់ភ្ញៀវទេសចរជាតិ និងអន្តរជាតិយ៉ាងបានទូលំទូលាយ។

យោងតាមក្រសួងទេសចរណ៍ កម្មវិធីជជែកលើវិថីទេសចរណ៍ នឹងធ្វើឡើងនៅវេលាម៉ោង ១៨:០០ ដល់ម៉ោង២០:០០នាទី។ សម្រាប់កម្មវិធីនេះ នឹងមានសកម្មភាពសំខាន់ៗកម្មវិធីជជែកលើវិថីទេសចរណ៍រួមមាន៖ ការសម្តែងទស្សនីយភាពសិល្បៈដោយក្រុមតន្ត្រីយុវជនអង្គរ Angkor Youth Orchestra, កិច្ចពិភាក្សាជាមួយវាគ្មិនកិត្តិយស អំពីបទពិសោធន៍ចំពោះវិស័យទេសចរណ៍, និងការច្រៀងចម្រៀងជាតិលើកទឹកចិត្តដល់វីរកងទ័ពជួរមុខ។

កម្មវិធីដែលនឹងធ្វើឡើងនៅចុងសប្តាហ៍នេះ នឹងចូលរួមបំផុសស្មារតីប្រជាជន កម្ពុជា ឱ្យចេះសេ្នហាជាតិ ស្រឡាញ់មាតុភូមិ អភិរក្សអភិវឌ្ឍសិល្បៈវប្បធម៌ សម្បត្តិធម្មជាតិ ជាពិសេសលើកកម្ពស់កិត្យានុភាពជាតិ និងបង្ហាញទៅកាន់ពិភពលោកថាកម្ពុជា ជាគោលដៅទេសចរណ៍សុវត្ថិភាព (Cambodia Safe) ផ្ដល់នូវភាពកក់ក្ដៅ៕