ភ្នំពេញ៖ លោក យក់ ឧសភា អនុព័ន្ធពាណិជ្ជកម្មអមស្ថានឯកអគ្គកុងស៊ុលប្រចាំទីក្រុងសៀងហៃ ស្នើឱ្យក្រុមហ៊ុន Hangxiao Steel Structure ដែលវិនិយោគលើវិស័យរចនាសម្ព័ន្ធដែក ផ្លូវដែក ស្ពាន មជ្ឍមណ្ឌលពាណិជ្ជកម្ម ព្រលានយន្តហោះ ការរចនាម៉ូតគម្រោង ការផលិតនិងសាងសង់នៅប្រទេសចិន ឱ្យមកវិនិយោគនៅកម្ពុជា។

ជាមួយគ្នានេះ លោក Huang Xinliang អគ្គនាយករងក្រុមហ៊ុន Hangxiao Steel Structure បានបង្ហាញពីចំណាប់អារម្មណ៍អំពីឱកាសវិនិយោគនៅប្រទេសកម្ពុជា និងបានឯកភាពលើការបន្តជួបភាគីកម្ពុជានៅខែបន្ទាប់ និងបានអញ្ជើញភាគីកម្ពុជាទៅទស្សនកិច្ចសិក្សានៅក្រុមហ៊ុនរបស់លោកនៅទីក្រុងហានចូវ ខេត្តជឺជាង ក្នុងពេលខាងមុខផងដែរ។

លោក យក់ ឧសភា ក៏បានលើកឡើងអំពីចំណុចលើកទឹកចិត្តមួយចំនួនដែលមានចែងក្នុងច្បាប់វិនិយោគថ្មីនៃប្រទេសកម្ពុជា និងបន្តណាត់ជួបក្រុមហ៊ុនរបស់លោក Huang បន្ថែមទៀត ដើម្បីបន្តនូវវឌ្ឍនភាព និងឈានទៅដល់កិច្ចសហប្រតិបត្តិការក្នុងពេលខាងមុខឆាប់ៗនេះ៕