ភ្នំពេញ៖ គណៈប្រតិភូសហព័ន្ធឧស្សាហកម្ម និងពាណិជ្ជកម្មខេត្តសានទុង មានបំណងស្វែងរកឱកាសវិនិយោគថ្មីៗ និងគាំទ្រសហគ្រាសធុនតូច និងមធ្យម (SMEs) របស់កម្ពុជា ពិសេសលើការកែលម្អបច្ចេកវិទ្យា និងគ្រឿងម៉ាស៊ីន។ នេះបើតាមការបញ្ជាក់របស់លោក យ៉ាង ហុងយូ ប្រធានប្រតិភូឧស្សាហកម្មខេត្តសានទុង។

ក្នុងជំនួបកាលពីថ្ងៃទី១១ ខែធ្នូ ឆ្នាំ២០២៥ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ក្រសួង គឺស្វាគមន៍ការវិនិយោគពីខេត្តសានទុង និងរីករាយក្នុងការចែករំលែកព័ត៌មាន និងផ្តល់សេវាគាំទ្រ ដើម្បីរួមចំណែកដល់ជោគជ័យនៃអាជីវកម្មរបស់លោកអ្នកនៅកម្ពុជា។ ឯកឧត្តម ហែម វណ្ណឌី បានស្នើឱ្យខេត្តសានទុងដើរតួនាទីសំខាន់ក្នុងការវិវត្តនេះ ពិសេសជួយពង្រឹងសមត្ថភាពអ្នកផ្គត់ផ្គង់ជាសហគ្រាសក្នុងស្រុក និងការចែករំលែកបច្ចេកវិទ្យាសមស្រប និងស្នើឱ្យខេត្តសានទុងគាំទ្រកម្ពុជា មិនមែនត្រឹមតែសម្រាប់ប្រាក់ចំណេញរយៈពេលខ្លីទេ ប៉ុន្តែក៏សម្រាប់អនាគតក្រោយឆ្នាំ២០២៩ ផងដែរ។

លោក យ៉ាង ហុងយូ ក៏បានបង្ហាញពីមូលដ្ឋានឧស្សាហកម្មដ៏រឹងមាំ និងបណ្តាញធុរកិច្ចដ៏ធំទូលាយរបស់ខេត្តសានទុង ដែលមានសមាជិកជាង ៤០ម៉ឺននាក់នៅក្នុងសហព័ន្ធ ដោយមួយចំនួនកំពុងធ្វើអាជីវកម្មដោយជោគជ័យនៅកម្ពុជា ហើយសំឡឹងឃើញឱកាសកាន់តែច្រើនសម្រាប់កិច្ចសហការ ជាពិសេសលើនវានុវត្តន៍។ លោក យ៉ាង ហុងយូ បានបន្ថែមថា ដំណើរទស្សនកិច្ចមកកម្ពុជានេះ មានគោលបំណងលើកទឹកចិត្តសហគ្រាសខេត្តសានទុងជាច្រើនទៀត ឱ្យស្វែងរកឱកាសវិនិយោគ និងផ្តល់សេវាកម្មនៅកម្ពុជា៕