ភ្នំពេញ៖ ការអនុវត្តយន្តការច្រកចេញចូលតែមួយនៃគម្រោងឧស្សាហកម្មសមាហរ័ណ III នឹងជួយដល់ការធ្វើពិពិធកម្មទីផ្សារនាំចេញ និងការពង្រឹងការធ្វើសមាហរ័ណកម្មទីផ្សារ ពិសេសខ្សែច្រវាក់ផ្គត់ផ្គង់ជាមួយប្រទេសចិន តាមរយៈការចាប់យកឧស្សាហកម្មបន្លាស់ទី និងកន្សោមឧស្សាហកម្មលើវិស័យអាទិភាពចំនួន ៣រួមមាន៖ វិស័យយានយន្ត, វិស័យអេឡិចត្រូនិក និងវិស័យកសិ-ឧស្សាហកម្ម។

ជាមួយគ្នានេះ ក្រុមប្រឹក្សាអភិវឌ្ឍន៍កម្ពុជា បានពន្លឿនការរៀបចំលិខិតបទដ្ឋានគតិយុត្តិ សំដៅអាចចាប់ផ្តើមសាកល្បងការអនុវត្តយន្តការច្រកចេញចូលតែមួយនៃគម្រោង III ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានជួបពិភាក្សាការងារជាមួយក្រុមការងារក្រសួងសេដ្ឋកិច្ច និងហិរញ្ញវត្ថុ ដឹកនាំដោយឯកឧត្តមបណ្ឌិតសភាចារ្យ ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដើម្បីស្វែងយល់ឱ្យបានច្បាស់អំពីគោលគំនិត ក៏ដូចជាលក្ខណៈបច្ចេកទេសនៃការអនុវត្តគម្រោង III៕