ភ្នំពេញ៖ ក្រសួងសាធារណការ និងដឹកជញ្ជូន ក្រុមជំនាញការនៃក្រុមហ៊ុនទីប្រឹក្សាបច្ចេកទេសជប៉ុន របស់គម្រោងអភិវឌ្ឍន៍ផែនការមេ និងក្រុមជំនាញការទីភ្នាក់ងារសហប្រតិបត្តិការអន្តរជាតិជប៉ុន (JICA) ពិភាក្សាការងារ លើគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

កិច្ចពិភាក្សា ដែលធ្វើឡើង កាលពីថ្ងៃទី១៤ ខែមករា ឆ្នាំ២០២៦ នេះ ក្រសួងសាធារណការ និងភាគីជប៉ុន បានពិនិត្យនិងពិភាក្សាលើការរៀបចំរបាយការណ៍បឋម និងផែនការសកម្មភាព (Workplan) សម្រាប់ការផ្តើមអនុវត្តគម្រោងរៀបចំផែនការមេ, ការកំណត់នូវសមាសភាពស្ថាប័នពាក់ព័ន្ធក្នុងការបង្កើតក្រុមការងារជំនាញ (Working Group), ការងារត្រៀមរៀបចំកិច្ចប្រជុំគណៈកម្មការសម្របសម្រួលរួមលើកទី១ (1st JCC) និងការរៀបចំសិក្ខាសាលាពិគ្រោះយោបល់សម្រាប់ការអនុវត្តគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ ក៏បានបញ្ជាក់ដល់ក្រុមហ៊ុនទីប្រឹក្សាបច្ចេកទេស អំពីការត្រៀមលក្ខណៈជានិច្ចរបស់ក្រសួងសាធារណការ ក្នុងការផ្តល់កិច្ចសហការបន្ថែមទៀត ធ្វើយ៉ាងណាជំរុញឱ្យការសិក្សាផែនការលម្អិតរបស់គម្រោងនេះមានភាពច្បាស់លាស់ គ្រប់ជ្រុងជ្រោយ និងត្រឹមត្រូវតាមលក្ខណៈបច្ចេកទេស សំដៅឱ្យការសិក្សាទទួលបានលទ្ធផលផ្លែផ្កាស្របតាមផែនការដែលបានគ្រោងទុក៕