ភ្នំពេញ៖ អង្គភាពគ្រប់គ្រងគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (PMU-UIDP) ជាមួយនឹងសម្ព័ន្ធក្រុមហ៊ុន KUNHWA ENGINEERING & CONSULTING CO., LTD. ចុះហត្ថលេខាលើកិច្ចសន្យា ដើម្បីអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង (Urban Infrastructure Development Project - UIDP)។

ក្នុងពិធីចុះហត្ថលេខាលើកិច្ចសន្យា ដែលធ្វើឡើងក្រោមអធិបតីភាព ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន មានគោលបំណងរៀបចំរបាយការណ៍សិក្សាសមិទ្ធលទ្ធភាព (FSR) របាយការណ៍វាយតម្លៃផលប៉ះពាល់បរិស្ថាន និងសង្គម (ESIAR) និងប្លង់បច្ចេកទេសលម្អិត (DED) លើគម្រោងប្រព័ន្ធប្រព្រឹត្តកម្មទឹកកខ្វក់ និងប្រព័ន្ធរំដោះទឹក សម្រាប់ក្រុងចំនួន៤ ដូចជា៖ ក្រុងកំពង់ឆ្នាំង ក្រុងកំពង់ចាម ក្រុងដូនកែវ (ខេត្តតាកែវ) និងក្រុងព្រៃវែង និងគម្រោងទីលានទុកដាក់សំរាមស្តង់ដារ និងហេដ្ឋារចនាសម្ព័ន្ធគ្រប់គ្រងសំណល់ សម្រាប់ក្រុងដូនកែវ និងក្រុងព្រៃវែង។

គួរបញ្ជាក់ថា កិច្ចសន្យាអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធទីក្រុង ធ្វើឡើងក្រោមហិរញ្ញប្បទានឥតសំណងពីមូលនិធិពិសេសសម្រាប់ការរៀបចំគម្រោង (Project Preparation Special Fund - PPSF) របស់ ធនាគារវិនិយោគហេដ្ឋារចនាសម្ព័ន្ធអាស៊ី (AIIB) កាលពីថ្ងៃទី១៩ ខែមករា ឆ្នាំ២០២៦៕