ភ្នំពេញ៖ ឯកឧត្តម ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម និងលោកស្រីបណ្ឌិត Tanu Priya អនុប្រធានបេសកកម្មទទួលបន្ទុកពាណិជ្ជកម្ម និងនយោបាយ នៃស្ថានទូតឥណ្ឌាប្រចាំកម្ពុជា បាន ពិភាក្សាការងាររឹតចំណងទំនាក់ទំនងទ្វេភាគី ក៏ដូចជាបង្កើនទំហំពាណិជ្ជកម្មទ្វេភាគីកម្ពុជា-ឥណ្ឌាឱ្យកាន់តែរីកចម្រើនបន្ថែមទៀត។

ភាគីទាំងពីរ បានលើកឡើងអំពីការកំណត់ទិសដៅអាទិភាព ក្នុងការពង្រឹងទំនាក់ទំនងទ្វេភាគីទៅវិញទៅមករវាងវិស័យឯកជននៃប្រទេសទាំងពីរ និងមានភាពប្រទាក់ក្រឡាគ្នា ក្នុងវិស័យសក្តានុពល ព្រមទាំងកិច្ចសហការរវាងរដ្ឋាភិបាលនិងរដ្ឋាភិបាល វិស័យឯកជននិងវិស័យឯកជន ពាក់ព័ន្ធនឹងការធ្វើពាណិជ្ជកម្មនិងវិនិយោគលើវិស័យកសិកម្ម កសិ-ឧស្សាហកម្មនិងកែច្នៃ ឱសថ ឌីជីថល វិទ្យាសាស្ត្រ និងបច្ចេកវិទ្យាការបើកច្រកទីផ្សារទ្វេភាគី និងតំបន់ ជាពិសេសទីផ្សារអាស៊ាន ជាដើម។

ភាគីទាំងពីរ ក៏បានជជែកពិភាក្សាលើយន្តការទ្វេភាគី និងតំបន់ដែលមានស្រាប់ ក្នុងការជំរុញយន្តការនេះឱ្យមានសកម្មភាពកាន់តែផុសផុល និងមានផ្លែផ្កាកាន់តែល្អប្រសើរ៕