ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជា ពិភាក្សាជាមួយ លោក សាស្រ្តាចារ្យ Ricardo Hausmann ស្ថាបនិក និងជាប្រធានមជ្ឈមណ្ឌល Growth Lab នៃសាកលវិទ្យាល័យ Harvard ដើម្បីពិនិត្យលទ្ធភាពក្នុងការបង្កើត Growth Lab នៅកម្ពុជា ក្រោមកិច្ចសហការជាមួយកម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)។

Growth Lab គឺជាមជ្ឈមណ្ឌលស្រាវជ្រាវឈានមុខ ដែលផ្តោតលើការវិភាគសេដ្ឋកិច្ចជាក់ស្តែង ដើម្បីគាំទ្រការរៀបចំគោលនយោបាយ និងយុទ្ធសាស្ត្រកំណើនប្រកបដោយភស្តុតាងវិទ្យាសាស្ត្រ។ គំនិតផ្តួចផ្តើមនេះ មានគោលបំណងជំរុញកំណើនសេដ្ឋកិច្ចកម្ពុជា ឱ្យកាន់តែមានភាពសម្បូរបែប និងមានភាពធន់តាមរយៈការសិក្សាស្រាវជ្រាវ និងការអនុវត្តយុទ្ធសាស្ត្របែបវិទ្យាសាស្ត្រ។

សូមជម្រាបផងដែរថា ជំនួបរវាង ឯកឧត្តម ស៊ុន ចាន់ថុល និងលោក សាស្រ្តាចារ្យ Ricardo Hausmann ធ្វើឡើងក្នុងឱកាសនៃការចូលរួមវេទិកាសេដ្ឋកិច្ចពិភពលោក ឆ្នាំ២០២៦ នៅទីក្រុងដាវ៉ុស ប្រទេសស្វីស កាលពីថ្ងៃទី២២ ខែមករា ឆ្នាំ២០២៦៕