ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លេីកទឹកចិត្តឱ្យវិនិយោគិនទាំងអស់ ពិសេសវិនិយោគិនអាម៉េរិក ដែលមានបំណងចង់វិនិយោគលេីវិស័យផលិតកម្មសត្វ ការកែច្នៃ វេចខ្ចប់ បន្តពិនិត្យលទ្ធភាពដេីម្បីឱ្យការវិនិយោគទទួលបានជោគជ័យ។

ក្នុងជំនួបជាមួយលោក Kim Chha Hout ប្រធានសភាពាណិជ្ជកម្មកម្ពុជា-រដ្ឋកាលីហ្វ័រញ៉ា ឯកឧត្តម ឌិត ទីណា បានទទួលស្វាគមន៍វិនិយោគិនអាម៉េរិកក្នុងការពង្រឹងនិងពង្រីកកិច្ចសហប្រតិបត្តិការកសិ-ពាណិជ្ជកម្ម សំដៅបំពេញឱ្យគ្នាទៅវិញទៅមក និងទទួលផលចំណេញទាំងអស់គ្នា។ 

ឯកឧត្តមរដ្ឋមន្រ្តីកសិកម្ម ក៏បានជំរុញដល់ធុរជនអាម៉េរិក ពង្រឹងនិងពង្រីកការវិនិយោគនិងការធ្វេីកសិ-ពាណិជ្ជកម្មរវាងប្រទេសទាំងពីរ ជាពិសេសការនាំចេញកសិផលកម្ពុជាទៅកាន់ទីផ្សារអន្តរជាតិ ហេីយក្រសួងកសិកម្មនឹងរួមចំណែកសម្របសម្រួលកិច្ចខិតខំប្រឹងប្រែងនេះ៕