ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះបញ្ជីសហគ្រាសធុនតូចនិងមធ្យម (SMEs) និងសិប្បកម្ម ផ្នែកកម្មន្តសាល សរុបបានចំនួន ១ ២៦២មូលដ្ឋាន ក្នុងនោះបានចេញវិញ្ញាបនបត្រដំណើរការចំនួន ១ ១៤៨មូលដ្ឋាន និងវិញ្ញាបនបត្របន្តចំនួន ១ ៣៦៧មូលដ្ឋាន ដែលបានបង្កើតការងារថ្មីចំនួន ២៣ ៥៩៧នាក់។

ជាមួយគ្នានេះ ក្នុងឆ្នាំ២០២៥ សហគ្រាសធុនតូច និងមធ្យម និងសិប្បកម្ម ដែលត្រូវបានបិទមានចំនួន ៤៣៧មូលដ្ឋាន ធ្វើឱ្យថមថយកម្លាំងពលកម្មចំនួន ៧ ៦៨៩នាក់។ របាយការណ៍លទ្ធផលការងារឆ្នាំ២០២៥ និងទិសដៅការងារឆ្នាំ២០២៦ បានបញ្ជាក់ថា គិតត្រឹមដំណាច់ឆ្នាំ២០២៥ ទិន្នន័យស្ថិតិសហគ្រាសធុនតូចនិងមធ្យម និងសិប្បកម្ម សរុបមានចំនួន ៤៤ ៧៩៥មូលដ្ឋាន ក្នុងនោះមានសហគ្រិនស្ត្រី ៨ ៦៧០មូលដ្ឋាន និងពលកម្មចំនួន ៤៩២ ១៣១នាក់ ដែលមានស្ត្រី ១៥៥ ៥១៣នាក់។

ជាមួយគ្នានេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា កម្ពុជា រក្សាបាននូវស្ថិរភាពម៉ាក្រូសេដ្ឋកិច្ច និងកំពុងឈានចូលដំណាក់កាលថ្មីនៃការអភិវឌ្ឍ។ ជាមួយនឹងគោលដៅចាកចេញពីឋានៈជាប្រទេសដែលមានការអភិវឌ្ឍតិចតួចនៅឆ្នាំ២០២៩ និងចក្ខុវិស័យឆ្នាំ២០២៥ ក្លាយជាប្រទេសមានចំណូលខ្ពស់ កម្ពុជាត្រូវមានមូលដ្ឋានគ្រឹះសេដ្ឋកិច្ចរឹងមាំ អភិបាលកិច្ចរឹងប៉ឹង និងប្រព័ន្ធនានារបស់ជាតិដែលខ្លាំងក្លា៕