ភ្នំពេញ៖ កម្ពុជា ជាប់លេខ៧ ជា «ប្រទេសល្អបំផុត សំដៅលើឱកាសការងារ សម្រាប់ជនបរទេស នៅក្នុងឆ្នាំ២០២៦» ដែលចំណាត់ថ្នាក់នេះ ត្រូវបានវាយតម្លៃ និងធ្វើឡើងដោយស្ថាប័ន GoAbroad ។ គោលដៅនៃប្រទេសទាំងនេះ ត្រូវបានបង្ហាញថា មានភាពលេចធ្លោ សម្រាប់ឱកាសការងារ តុល្យភាពការងារ-ជីវិត និងគុណភាពជីវិតនៅឆ្នាំ ២០២៦។

សម្រាប់ចំណាត់ថ្នាក់លេខ១ បានទៅលើ កូរ៉េខាងត្បូង, បារាំង ជាប់លេខ២ និងជប៉ុន ជាប់លេខ៣។ ដោយឡែក ប្រទេសកម្ពុជា ត្រូវបានជាប់លេខ៧ នៅក្នុងចំណាត់ថ្នាក់នេះ ដោយសារតម្រូវការខ្ពស់ ចំពោះគ្រូបង្រៀនភាសាអង់គ្លេស ដែលអនុញ្ញាតឱ្យជនបរទេស អាចរស់នៅបានយ៉ាងសមរម្យ ដោយផ្អែកលើប្រាក់ខែបង្រៀន ខណៈពេលដែលអាចបង្កើតឥទ្ធិពលវិជ្ជមានសម្រាប់អ្នកទាំងនោះ រួមទាំងមធ្យោបាយក្នុងការធ្វើដំណើរប្រកបដោយចីរភាព ផងដែរ៕