ញូវយ៉ក ថ្ងៃទី២៨ ខែតុលា ឆ្នាំ២០២៦ ឯកឧត្តម យោង ចាន់សុភារ តំណាងអចិន្ត្រៃយ៍រងកម្ពុជា ប្រចាំអង្គការសហប្រជាជាតិ (UN) បានចូលរួមថ្លែងសេចក្តីថ្លែងការណ៍នៅក្នុងកិច្ចប្រជុំបើកចំហរកម្រិតខ្ពស់របស់ក្រុមប្រឹក្សាសន្តិសុខ UN ស្តីពី “ស្ត្រី សន្តិភាព និងសន្តិសុខ” ដែលដឹកនាំដោយ ឯកឧត្តមGeorge Gerapetritis រដ្ឋមន្ត្រីការបរទេសក្រិក ក្នុងនាមជាប្រធានក្រុមប្រឹក្សាសន្តិសុខប្រចាំខែតុលា ឆ្នាំ២០២៦។

នៅក្នុងសេចក្តីថ្លែងការណ៍ ឯកឧត្តមបានសង្កត់ធ្ងន់អំពីការលើកកម្ពស់សមភាពយេនឌ័រ និងបន្តជំរុញរបៀបវារៈនៃការចូលរួមរបស់ស្ត្រី ក្នុងការសម្រេចបាននូវសន្តិភាពយូរអង្វែង ការអភិវឌ្ឍនយោបាយ និងកំណើនសេដ្ឋកិច្ចប្រកបដោយបរិយាប័ន្ន។ ទន្ទឹមនេះ ឯកឧត្តមក៏បានគូសបញ្ជាក់អំពីការចូលរួមកម្ពុជាជាមួយសហគមន៍អន្តរជាតិ តាមរយៈការបញ្ជូនកងកម្លាំងរក្សាសន្តិភាពជាង ១០.០០០ នាក់ ដែលក្នុងនោះ កងកម្លាំងរក្សាសន្តិភាពស្ត្រីជាង ១.០០០ នាក់ទៅកាន់បេសកកម្មចំនួន ១២ របស់ អង្គការសហប្រជាជាតិ៕