ភ្នំពេញ៖ កម្ពុជា និងឡាវ ពង្រឹង និងពង្រីកកិច្ចសហប្រតិបត្តិការលើវិស័យពាណិជ្ជកម្ម ទេសចរណ៍ និងវិស័យហិរញ្ញវត្ថុ។ ក្រៅពីវិស័យទាំងនេះ សម្តេចធិបតី ហ៊ុន ម៉ាណែត និងឯកឧត្តម សនសៃ ស៊ីផាន់ដន នាយករដ្ឋមន្ត្រីឡាវ ក៏បានពិភាក្សាលើការសហការ ក្នុងវិស័យវិនិយោគ ថាមពល អប់រំ ការកសាងហេដ្ឋារចនាសម្ព័ន្ធតភ្ជាប់ប្រទេសទាំងពីរ នយោបាយ និងវិស័យការពារជាតិ។

ប្រមុខរដ្ឋាភិបាលទាំងពីរ បានពិភាក្សាលើការពេញចិត្ត និងវាយតម្លៃខ្ពស់ចំពោះភាពរីកចម្រើននៃទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ដែលត្រូវបានពង្រឹង និងពង្រីកលើគ្រប់វិស័យ ពិសេស បន្ទាប់ពីបានដំឡើងកម្រិតទំនាក់ទំនងដល់ «ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង» កាលពីឆ្នាំ២០១៩។

ក្នុងជំនួបទ្វេភាគី នាឱកាសចូលរួមកិច្ចប្រជុំកំពូលអាស៊ាន លើកទី៤៤ និង៤៥ និងកិច្ចប្រជុំកំពូលពាក់ព័ន្ធ ពីថ្ងៃទី៩ ដល់ថ្ងៃទី ១១ ខែតុលា ឆ្នាំ២០២៤ នៅឡាវ ឯកឧត្តមនាយករដ្ឋមន្ត្រីឡាវ សនសៃ ស៊ីផាន់ដន បានសរសើរ និងវាយតម្លៃខ្ពស់ចំពោះការសម្រេចបាននូវសមិទ្ធផលជាច្រើនរបស់រាជរដ្ឋាភិបាលកម្ពុជា។ ឯកឧត្តម សនសៃ ស៊ីផាន់ដន ក្រោមការដឹកនាំរបស់សម្តេចធិបតី ហ៊ុន ម៉ាណែត កម្ពុជាបានកែលម្អកាន់តែប្រសើរឡើងនូវជីវភាពរស់នៅរបស់ពលរដ្ឋ និងការលើកតម្កើងកិត្យានុភាពកម្ពុជានៅលើឆាកតំបន់ និងអន្តរជាតិ៕