ភ្នំពេញ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ជំរុញឱ្យវិស័យឯកជន និងស្ថាប័នរដ្ឋប្រកាន់យកគោលការណ៍ឈ្នះឈ្នះ ដើម្បីឆ្លើយតបទៅនឹងកិច្ចគាំពារបរិស្ថាន ដែលបម្រើឱ្យប្រយោជន៍ដល់អ្នកវិនិយោគ បរិស្ថានកម្ពុជា និងដល់រាជរដ្ឋាភិបាល រួមទាំងប្រជាពលរដ្ឋផងដែរ។

តាមការលើកឡើងរបស់ ឯកឧត្តមបណ្ឌិត អ៊ាង សុផល្លែត ក្រសួងបរិស្ថាន គឺប្រកាន់យកនូវគោលការណ៍ឈ្នះឈ្នះ ដែលជារូបមន្តដ៏មានស័ក្តិសិទ្ធិភាព បំពេញឱ្យគ្នាទៅវិញទៅមករវាងស្ថាប័នរដ្ឋ និងវិស័យឯកជន ក្នុងការអនុវត្តសកម្មភាពនានាពាក់ព័ន្ធនឹងវិស័យបរិស្ថាន ដើម្បីសម្រេចបានទិសដៅយុទ្ធសាស្រ្តរៀងៗខ្លួន ក្នុងគោលបំណងពង្រឹងកិច្ចសហការ បង្កើនប្រសិទ្ធភាពការងារ និងមាននិរន្តរភាព។

ក្រសួងបរិស្ថាន តែងតែស្វាគមន៍ជានិច្ចនូវការចូលរួមសហការពីសំណាក់វិស័យឯកជន ក្នុងកិច្ចការពារបរិស្ថាន ដើម្បីភាពស្អាត និងភាពបៃតង។ នេះបើតាមការលើកឡើងរបស់ ឯកឧត្តមបណ្ឌិត អ៊ាង សុផល្លែត ក្នុងពិធីចុះអនុស្សរណៈនៃការយោគយល់គ្នាស្តីពី «ការចូលរួមបណ្តុះពន្លកបៃតង» រវាងក្រសួងបរិស្ថាន ជាមួយ ក្រុមហ៊ុន SMART Axiata Co., LTD កាលពីថ្ងៃទី១៩ ខែធ្នូ ឆ្នាំ២០២៤៕