ភ្នំពេញ៖ សភាពាណិជ្ជកម្មកម្ពុជា និងស្ថានទូតថៃ នឹងសហការរៀបចំកម្មវិធីផ្គូផ្គងធុរកិច្ចថៃ-កម្ពុជា ក្នុងវិស័យសុខាភិបាល និងសម្រស់ នៅខែមីនា ឆ្នាំ២០២៥ ខាងមុខ។ នេះបើតាមជំនួបពិភាក្សារវាង ឯកឧត្តម ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា និង លោក Nirawat Rangseekanjana ទីប្រឹក្សាពាណិជ្ជកម្មស្ថានទូតថៃ។

បើតាមការចុះផ្សាយរបស់សភាពាណិជ្ជកម្មកម្ពុជា ពាក់ព័ន្ធនឹងកម្មវិធីផ្គូផ្គងធុរកិច្ចថៃ-កម្ពុជា នេះ លោក Nirawat Rangseekanjana បានស្នើសុំការសហការ ពីសភាពាណិជ្ជកម្មកម្ពុជា នាថ្ងៃទី២១ ខែមករា ឆ្នាំ២០២៥។ ឯកឧត្តម ឧកញ៉ា អគ្គនាយកសភាពាណិជ្ជកម្មកម្ពុជា លើកឡើងថា នឹងជួយគាំទ្រនៅក្នុងកម្មវិធីនេះ ដើម្បីពង្រឹងទំនាក់ទំនងធុរកិច្ចរវាងកម្ពុជា និងថៃ ហើយក៏ជាឱកាសល្អសម្រាប់សមាជិកសភាពាណិជ្ជកម្មកម្ពុជា ក្នុងការបង្កើតទំនាក់ទំនងអាជីវកម្មបន្ថែមទៀត៕