ភ្នំពេញ៖ QR Code ត្រូវបានសង្កេតឃើញថាមានការកើនឡើងយ៉ាងឆាប់រហ័សក្នុងប៉ុន្មានឆ្នាំនេះ ប៉ុន្តែភាពពេញនិយមនៃការប្រើប្រាស់ QR Code ក៏បង្កជាហានិភ័យសុវត្ថិភាពផងដែរ ក្នុងនោះក៏មានការឆបោកតាមរយៈ QR Code ដោយការប្រើកូដ QR ក្លែងក្លាយ ដើម្បីបញ្ឆោតអ្នកប្រើប្រាស់ឱ្យស្កេនបើកគេហទំព័រឬទាញយកកម្មវិធី ឬទូទាត់ប្រាក់ទៅកាន់គណនីក្លែងបន្លំណាមួយ។

ដើម្បីការពារខ្លួនពីការឆបោកតាមរយៈ QR Code សាធារណជនអាចប្រើប្រាស់វិធីសាស្រ្តចំនួន ៤រួមមាន៖ ទី១.ស្កេន QR Code ពីប្រភពច្បាស់លាស់, ទី២.ពិនិត្យមើល QR Code គឺត្រូវរកមើលភាពមិនប្រក្រតី ឬព័ត៌មានលម្អិត មិនធម្មតាណាមួយ ដូចជាស្ទីកគ័រដាក់លើ QR Code ពិតប្រាកដ ពណ៌ខុសពីធម្មតា ឬខុសអក្ខរាវិរុទ្ធ, ទី៣.កុំស្កេនកូដពីអ៊ីម៉ែល ឬអត្ថបទណាដែលអ្នកមិនធ្លាប់ស្គាល់ និងទី៤.វាយបញ្ចូល URL គេហទំព័រដោយដៃជំនួសឱ្យការស្កេនQR Code។ នេះបើតាមការចុះផ្សាយរបស់កម្ពុជាឆ្ពោះទៅកាន់ឌីជីថល៕